უკვე გადაწყვეტილი ამბავია, რომ ევროპის მორაგბეთა საკლუბო თასების - “ჰაინეკენის თასი” და “ამლინ ჩელენჯ ქაფი” ამ ფორმატით წელს უკანასკნელად იმართება და შემოდგომიდან მათ ნაცვლად სამი ახალი ევროტურნირი გაიმართება.

ჩვენთვის სასიხარული ისაა, რომ ევროასპარეზზე გასვლის შანსი ქართულ კლუბებსაც მიეცემათ და ეს ზოგადად ქართული რაგბის გარდა, საქართველოს ჩემპიონატის დონესაც აამაღლებს. გადაწყვეტილია, რომ სამივე ახალ ტურნირს ახლადშექმნილი ორგანიზაცია European Professional Club Rugby (EPCR) ჩაატარებს და მისი შტაბბინა შვეიცარიაში განთავსდება.

ცნობილია ახალი ტურნირების დასახელებებიც: უძლიერესი გუნდები European Rugby Champions Cup-ში მიიღებენ მონაწილეობას, ევროპის წამყვანი სარაგბო ქვეყნების დანარჩენი კლუბები European Rugby Challenge Cup-ში იასპარეზებენ, ხოლო ჩვენთვის ყველაზე საინტერესო, მესამე დონის ტურნირს, სადაც ქართული გუნდებიც მოხვდებიან, Qualifying Competition-ი ერქმევა.

Qualifying Competition-ის ორი გამარჯვებული გუნდი European Rugby Challenge Cup-ში მონაწილეობის უფლებას მიიღებს. ცნობილია, რომ შესარჩევ ტურნირში 8-იდან 12-მდე მეორე სარაგბო დონის, ანუ ერთა თასის მონაწილე ქვეყნებისა და იტალიური კლუბები მიიღებენ მონაწილეობას. შესარჩევ ტურნირში მონაწილე გუნდებს EPCR-ი და ევროპული რაგბის მმართველი ორგანიზაცია FIRA-AER-ი ერთობლივად შეარჩევენ.

ტურნირის ჩატარების სისტემა ჯერჯერობით ჩამოუყალიბებელია, მაგრამ არსებობს გარკვეული მონახაზები და საბოლოო ვერდიქტი უახლოეს პერიოდში უნდა გახდეს ცნობილი, რადგან ახალი გათამაშებები პირველად 2014/2015 წლების სეზონში ჩატარდება, ანუ სულ მალე დაიწყება. წინასწარი ინფორმაციით, საქართველოს ევროთასებზე ორი გუნდის გაყვანის უფლება ექნება.