23-25 სექტემბერს საქართველოს ევროპის ოლიმპიური კომიტეტების საორგანიზაციო კომისიის (COCOM) წევრები ეწვევიან.

ჯოზეფ ლიბა, კატერინა ნიცოვა,კარეტოს სტრატოსი და ჯორჯ ვისაცკი შეაფასებენ, თუ როგორ მიდის ევროპის ახალგაზრდული ოლიმპიური ფესტივალის „თბილისი 2015“-ისათვის მზადება. მათ უმასპინძლებს Tbilisi2015 EYOF  საორგანიზაციო კომიტეტის თავმჯდომარე ალექსი ახვლედიანი.
COCOM-ის წევრების ვიზიტი რეგულარულ ხასიათს ატარებს, ბოლოს თბილისს ისინი ამ წლის აპრილში სტუმრობდნენ.

შეგახსენებთ, მსგავსი მასშტაბური სპორტული ღონისძიება საქართველოში პირველად ტარდება.
ოლიმპიური ფესტივალი  თბილისში 25.07.2015-01.08.2015 გაიმართება.  ფესტივალის მსვლელობის დროს, საქართველოს 4 000-მდე სპორტსმენი (13-18 წელი) ევროპის 49 ქვეყნიდან ეწვევა.  სტუმრების საერთო რაოდენობა კი რაოდენობა კი 7 000 მიაღწევს.

COCOM-ის წევრების ვიზიტის პროგრამა საკმაოდ ვრცელია. ისინი მოინახულებენ  ოლიმპიური სოფლისა და „ახალი თბილისის“ ტერიტორიებს.  დაათვალიერებენ ყველა მშენებარე ობიექტს, სადაც ჩატარდება სპორტული შეჯიბრებები და ყველა იმ ობიექტს, რომელიც შედის ინფრასტრუქტურაში.

სტუმრები შეხვდებიან თბილისის მერს და სპორტისა და ახალგაზრდობის სამინისტროს ხელმძღვანელებს.
დანიშნულია შეხვედრები Tbilisi2015 EYOF-ის ყველა დეპარტამენტთან, რომელიც  ოლიმპიური ფესტივალის ჩატარებაზეა პასუხისმგებელი.

თითოეული დეპარტამენტის მუშაობა წარდგენილი იქნება პრეზენტაციით, ხოლო ახალგაზრდული ოლიმპიური ფესტივალის „თბილისი 2015“-ის შემაჯამებელ პრეზენტაციას COCOM-ის წევრები 24 სექტემბერს გაეცნობიან.

თბილისი 2015-ის პრესსამსახური