დევისის თასის ფინალში შვეიცარიამ საფრანგეთი 3:1 დაამარცხა. მესამე გამარჯვება შვეიცარიას როჯერ ფედერერმა მოუტანა. შვეიცარიელმა “მაესტრომ” რიშარ გასკე 6:4, 6:2, 6:2 დაამარცხა.
პირველ სეტში 1:1-ზე როჯერმა ბრეიკი შეასრულა, რაც პირველი სეტის მოსაგებად საკმარისი აღმოჩნდა. მეორე და მესამე სეტებში, ფედერერმა 2-2 ბრეიკი შეასრულა და კარიერაში დევისის თასი პირველად მოიგო.
მატჩი საათსა და 55 წუთს გაგრძელდა. ფედერერმა 7 ეისი ჩააწოდა და არც ერთი ორმაგი შეცდომა არ დაუშვია. გასკემ 3 ეისი მოაწოდა და 2 ორმაგი შეცდომა დაუშვა.
აღსანიშნავია ის ფაქტი, რომ რიშარს მთელი მატჩის განმავლობაში არც ერთი ბრეიკ-პოინტი არ ჰქონია.
მატჩის დასრულების შემდეგ როჯერს სიხარულისგან ცრემლები წამოუვიდა. ფედერერის ჯილდოებს დევისის თასი აკლდა.
“ჯვაროსნები” 1992 წელს იყვნენ დევისის თასის ფინალში, მაგრამ ამერიკის ნაკრებთან დამარცხდნენ. 22 წლის შემდეგ შვეიცარიამ კვლავ გააღწია ფინალში. ამჯერად როჯერ ფედერერის და სტანისლას ვავრინკას დახმარებით “ჯვაროსნებმა” პირველად მოიგეს დევისის თასი.
