მსოფლიო რეიტინგსიის მეორე ნომერი როჯერ ფედერერი ამჟამად მშობლიურ ქალაქ ბაზელში ასპარეზობს, სადაც სასტარტო 2 წრე წარმატებით დაძლია. ამასთან, თუკი პირველ ეტაპზე 2 სეტით იოლად იმარჯვა, მომდევნო მატჩში, უზბეკეთის სახელით მოთამაშე დენის ისტომინთან გაუჭირდა – საწყისი სეტი სადიდსლემო შეჯიბრებების 17-გზის ჩემპიონმა 3:6 დათმო და მხოლოდ მომდევნო პარტიების მოგება (6:3, 6:3) მოახერხა. შეხვედრის დასრულების შემდეგ როჯერი ჟურნალისტებს გაესაუბრა.

- რამ განაპირობა თქვენი მარცხი პირველ სეტში?

- საწყის პარტიაში რიტმის გრძნობა დავკარგე. ამასთან, ისტომინი კარგად თამაშობდა. უსიამოვნო შეგრძნებადამეუფლა, მაგრამ თანდათან თამაშში “დავბრუნდი” და საბოლოოდ სასურველ შედეგსაც მივაღწიე.

- მომდევნო მოწინააღმდეგე გრიგორ დიმიტროვი გყავთ. მოასწრებთ ძალის სრულად აღდგენას?

- მეოთხედფინალს მზადყოფნაში შევხვდები. ბოლო დროს ბევრი მატჩი ჩავატარე და აღდგენის პრობლემა არ შემქმნია. კარგად ვიცი, როგორ ჩავდგე მწყობრში ისტომინთან რთული მატჩის შემდეგ.

- სეზონის მიწურულს ერთდროულად რამდენიმე ამოცანის გადაჭრა მოგიწევთ. ბაზელის შეჯიბრების შემდეგ ლონდონში წლის შემაჯამებელი ტურნირი და დევისის თასის ფინალი გელით...

- სადღეისოდ მხოლოდ ბაზელში გამარჯვებაზე ვფიქრობ. ეს ასპარეზობა ჩემთვის მეტად მნიშვნელოვანია, შემდეგ კი ლონდონის ტურნირის და დევისის თასის ფინალის დროც დადგება.

- რამდენიმე დღის წინათ განაცხადეთ, რომ კლასიფიკაციაში პირველ ადგილზე დაბრუნება გსურთ...

- როდესაც დიდი ხნის განმავლობაში რეიტინგს სათავეში ედექი, მოწინავე პოზიციაზე დაბრუნების სურვილი არ გასვენებს. ჯერჯერობით, მიზნისგან საკმაოდ შორს ვარ, თუმცა, თავს მშვენივრად ვგრძნობ, ურიგოდ არ ვთამაშობ და სეზონის დარჩენილ მატჩებში წარმატების მიღწევის საფუძვლიანი იმედი მაქვს.