თურქეთის სუპერთასი სტამბოლის „გალათასარაიმ“ ერთ წუთში მოიგო. მხოლოდ ერთი წუთი გაგრძელდა სატიტულე შეხვედრა, რადგან პროტესტის ნიშნად „ფენერბაჰჩემ“ თამაში შეწყვიტა.
სტამბოლური დერბი არ შედგა: „ფენერი“ მოედანზე ჯერ 19-წლამდე გუნდით გავიდა, შემდეგ მეტოქეს გოლი გაატანინეს და თამაში შეწყვიტეს. მიუხედავად სრული ქაოსისა, „გალათასარაის“ ფეხბურთელებმა სუპერთასის მოგება ჩვეულებრივად იზეიმეს გულშემატკივრებთან ერთად.
„ფენერბაჰჩემ“ თურქეთის ფეხბურთის ფედერაციას სთხოვა მატჩი გადაედო და უცხოელი მსაჯი დაენიშნა, რაზეც უარი მიიღო. შედეგად, მათ უკიდურეს ზომას მიმართეს და სუპერთასის ფინალს ბოიკოტი გამოუცხადეს.
„ფენერბაჰჩე“ თურქეთის ჩემპიონატის დატოვებასაც აპირებდა. ყველაფერი მას შემდეგ გამძაფრდა, რაც „ტრაბზონსპორთან“ მატჩის შემდეგ სტამბოლელ ფეხბურთელებს მეტოქე გუნდის ფანები მოედანზე თავს დაესხნენ.
