საქართველოს ეროვნული ლიგის მეექვსე ტური „დინამო თბილისის“ და „დილას“ მატჩით დასრულდა, რომელიც ძალიან საინტერესო და დაძაბული გამოდგა.

მასპინძლები ორჯერ იგებდნენ, მაგრამ სტუმრებმა ორჯერვე გაათანაბრეს და ქულა მოიპოვეს. პირველი ტაიმი „დინამომ“ ვასილიოს გორდეზიანის გოლით მოიგო. „პაოკიდან“ დამატებულ საქართველოს 21-წლამდე ნაკრების ფორვარდს დებიუტი ჰქონდა, რომელიც გოლით აღნიშნა. მას საგოლე პასი 16 წლის ვახტანგ სალიამ გაუკეთა.

„დილამ“ მეორე ტაიმის სტარტზე გაათანაბრა, როცა ნიკა გაგნიძის პასის მერე იბრაჰიმა დრამემ გაიტანა. 84-ე წუთზე სალიამ საგოლე პასს გოლიც დაუმატა და წინ გაიყვანა „დინამო“, რაც თითქოს, გამარჯვებას ნიშნავდა, მაგრამ 5 წუთში გორელებმა შოთა შეყილაძის გოლით მეორედ გაათანაბრეს - 2:2.

„დინამო თბილისი“ 8 ქულით მეხუთე ადგილზეა და მომდევნო ტურში „დინამო ბათუმს“ ესტუმრება, ხოლო „დილა“ 13 ქულით მეორეა და წინ „სამტრედიასთან“ მატჩი აქვს.

დღესვე, „თელავმა“ შინ კონკურენტი „გაგრა“ 1:0 დაამარცხა, რის შედეგადაც 6 ქულა დააგროვა, ხოლო „გაგრას“ აქტივში 4 ქულაა.

„დინამო თბილისი“ – „დილა“ 2:2 (1:0)

გოლები: 1:0 გორდეზიანი (29), 1:1 დრამე (50), 2:1 სალია (84), 2:2 შეყილაძე (89)