დღეს, 9 თებერვალს ჰანჯოუს სპორტულმა კომიტეტმა გაავრცელა საგანგებო განცხადება არგენტინისა და ნიგერიის ნაკრებებს შორის ამხანაგური მატჩის გაუქმების შესახებ, რომელიც ჩინეთის ამ ქალაქში მარტის მეორე ნახევარში უნდა გამართულიყო.
ტურნეს დროს სამხრეთ ამერიკელებმა პეკინში კოტ დ'ივუართან შეხვედრაც დაგეგმეს. ამ თამაშის შესახებ ინფორმაცია ჯერ არ არის.
„ცნობილი მიზეზების გამო, კომპეტენტური ორგანოები მივიდნენ დასკვნამდე, რომ არგენტინის ნაკრების მონაწილეობით მატჩის ჩატარების პირობები არ არსებობს. მიღებულია გადაწყვეტილება ამ ღონისძიების გაუქმების შესახებ“, - ნათქვამია განცხადებაში.
„ცნობილი მიზეზებით“ უნდა ვივარაუდოთ სკანდალი, რომელიც გასულ კვირას მოხდა ლიონელ მესის საქციელისა და მისი არმონაწილეობის გამო ჰონგ კონგში საგამოფენო მატჩში, სადაც „ინტერ მაიამი“ ჩავიდა. თუმცა, მან მალევე იაპონიაში ამხანაგურ შეხვედრაში ითამაშა.
