საბა ლობჟანიძე ბრწყინვალე სეზონს ატარებს და ეს კიდევ ერთხელ დაამტკიცა. „ჰათაისპორის“ ქართველმა ფეხბურთელმა ამჯერად „ბეშიქთაშის“ კარი დალაშქრა.
სტამბოლელები საკუთარ მოედანზე მიჩი ბატშუაიას გოლით დაწინაურდნენ, რასაც 42-ე წუთზე საბამ უპასუხა და დარჩენილ დროში არაფერი შეცვლილა - გუნდებმა ქულები გაიყვეს (1:1). 27 წლის ფეხბურთელმა მეტოქის კარი ულამაზესი საჯარიმო დარტყმით დალაშქრა. მან 82-ე წუთამდე ითამაშა.
ლობჟანიძეს თურქეთის სუპერლიგის მიმდინარე სეზონში 29 მატჩში 8 გოლი აქვს გატანილი, 8-ჯერ კი საგოლე პასი მიითვალა.
„ჰათაისპორი“ 30 ტურის შემდეგ 47 ქულით მეშვიდე ადგილზეა, მომდევნო შეხვედრას კი 4 აპრილს, შინ „ადანა დემირსპორთან“ ჩაატარებს.
