„უილიამსმა“ ფელიპე მასას შემცვლელად, გუნდში რუსი პილოტი სერგეი სიროტკინი მიიწვია, პოლონელი რობერტ კუბიცა კი სათადარიგო პილოტის როლზე დაითანხმა. ბრიტანულმა გუნდმა აბუ დაბიში გამართული ტესტების შემდეგვე მიანიშნა, რომ მისი არჩევანი სიროტკინის სასარგებლოდ იხრებოდა. თუმცა არც გამოცდილი კუბიცას დაკარგვა სურდა.
სათადარიგო პილოტის როლში, კუბიცა ბარსელონას წინასასეზონო ტესტებსა და რამდენიმე ეტაპის თავისუფალ პრაქტიკაზე იასპარეზებს. გარდა ამისა, თუ სეზონის მსვლელობისას, რომელიმე პილოტი სხვადასხვა მიზეზით ვერ შეძლებს გამოსვლას, კუბიცა მის ადგილს დაიკავებს.
ამგვარად, „უილიამსს“ მსოფლიო ჩემპიონატზე ყველაზე გამოუცდელი წყვილი ეყოლება. ლანს სტროლი 19 წლისაა და მან უკვე მოასწრო ერთი სრული სეზონის ჩატარება. 22 წლის სიროტკინის აქტივში კი მხოლოდ დაბალ ფორმულებში გამოსვლებია. კუბიცას მიწვევით, „უილიამსი“ დააკმაყოფილებს თავისი ტიტულოვანი სპონსორის, ალკოჰოლური სასმელების მწარმოებელი „მარტინის“ მოთხოვნას, რომლის შესაბამისადაც, გუნდში ერთი პილოტი მაინც, 25 წელზე მეტი ასაკის უნდა იყოს.
რაც შეეხება სიროტკინს, „უილიამსში“ მისი მისვლა, სოლიდურმა ფინანსურმა მხარდაჭერამ უზრუნველყო. გავრცელებული ინფორმაციით, გუნდი რუსი პილოტის მიწვევის სანაცვლოდ, ბიუჯეტს 15 მილიონი გირვანქა სტერლინგით შეივსებს.