გერმანიის ბუნდესლიგის სათავეში ორხელისუფლიანობაა. “ჰანოვერს” “დორტმუნდი” წამოეწია და ახლა ორივე გუნდი 10 ქულით ლიდერობს გათამაშებას.

“ყვითლებს” ძალიან ადვილი გასეირნება გამოუვიდათ და ეს მოსალოდნელიც იყო: “კიოლნმა” სეზონი კატასტროფულად დაიწყო და შარშანდელ სეზონთან შედარებით ისედაც დასუსტებულია. პეტერ ბოშის გუნდმა კი ჩემპიონთა ლიგაზე განცდილი მარცხის შემდეგ საკუთარი გულშემატკივრის თვალწინ რეაბილიტირება სრულად მოახერხა – 5:0. თუ “დორტმუნდი” ლიდერია, “თხების” საქმე სავალალოა: 0 ქულა და ბოლო პოზიცია სატურნირო ცხრილში.

ლევერკუზენის “ბაიერმა” არანაკლები დღე აყარა “ფრაიბურგს”. “ფარმაცევტებს” ცუდი სტარტი ჰქონდათ და ბუნებრივია დამაჯერებელი გამარჯვება ჰაერივით სჭირდებოდათ. საბოლოოდ, “ბაი არენაზე” შეკრებილმა ქომაგებმა 4 გატანილი გოლი იხილეს მეტოქის კარში და “ლევერკუზენმა” მიმდინარე სეზონში პირველი სამი ქულა მოიპოვა.

“ჰოფენჰაიმის” და “ჰერტას” შეხვედრა კი ფრედ დასრულდა. “სოფლელები” მალევე დაწინაურდნენ სანდრო ვაგნერის გოლით, მაგრამ დედაქალაქელები არ გატყდნენ და საბოლოოდ შინ ქულით დაბრუნება მოახერხეს. იულიან ნაგელსმანის გუნდს ჯერაც არ წაუგია და ლიდერებს ორი ქულით ჩამორჩება,.

“ჰოფენჰაიმი” – “ჰერტა” 1:1 (1:0)

გოლები: 1:0 ვაგნერი (6), 1:1 ეშვეინი (55)

“ლევერკუზენი” – “ფრაიბურგი” 4:0 (3:0)

გოლები: 1:0 ვოლანდი (21), 2:0 არანგიზი (29), 3:0 ვოლანდი (34), 4:0 ბრანდტი (86)

“დორტმუნდი” – “კიოლნი” 5:0 (2:0)

გოლები: 1:0 ფილიპი (2), 2:0 სოკრატისი (45), 3:0 ობამეიანგი (59, პენ), 4:0 ობამეიანგი (60), 5:0 ფილიპი (69)