იტალიის ნაკრებისა და ტურინის “იუვენტუსის” მეკარე ჯანლუიჯი ბუფონი ამბობს, რომ ფეხბურთის გარეშე ცხოვრება არ აშინებს. როგორც 39 წლის ფეხბურთელმა თქვა, იგი ამჟამად მომავალზე არ ფიქრობს. გარდა ამისა, ბუფონმა კრიტიკოსებს საინტერესოდ უპასუხა...
“ფეხბურთის გარეშე ცხოვრების არ მეშინია, რადგან მიყვარს სიცოცხლე. ახლა აქცენტი აწმყოზე მაქვს გაკეთებული, რადგან მომავლის შესახებ ფიქრებმა, შესაძლოა დღევანდელი დღის წარმატებაში ხელი შემიშალოს. ორიენტირებული ვარ ჩემს საქმეზე – ჩემი პროფესიონალიზმი და დამოკიდებულება არ შეცვლილა.
კრიტიკა? – ყოველთვის ასე იყო. უკვე წლებია, პირველივე შეცდომაზე ამბობენ, რომ დასასრულის დროა, ფეხბურთიდან უნდა წავიდე, მაგრამ ერთი კვირის წინ, ჩემპიონთა ლიგის საუკეთესო მეკარე გავხდი”, - აღნიშნა ჯიჯიმ.
შეგახსენებთ, ჯანლუიჯი ბუფონისთვის მიმდინარე სეზონი საფეხბურთო კარიერაში ბოლოა – იგი მსოფლიოს 2018 წლის ჩემპიონატის შემდეგ ხელთათმანებს ლურსმანზე დაკიდებს. თუმცა, იქამდე იტალიის ნაკრებს მუნდიალის საგზური მოსაპოვებელი აქვს – “სკუადრა აძურას” რუსეთში მოსახვედრად პლეი-ოფის გზის გავლა მოუწევს.
აქვე გეტყვით, რომ იტალია დღეს ისრაელის ნაკრებს ეთამაშება. ბუფონს აპენინელთა მთავარი გუნდის მაისური 170-ჯერ აქვს მორგებული, დებიუტი კი 1997 წელს, მოსკოვში, რუსეთის ნაკრების წინააღმდეგ ჰქონდა. იმ რუსეთში, სადაც კარიერის უკანასკნელი მატჩის ჩატარებას გეგმავს.
