“ვალენსიას” ახალგაზრდა ნახევარმცველის როდრიგო დე პაულის შეძენა “მარსელს”, “ბენფიკასა” და “მილანს” სურთ – იუწყება ესპანური გამოცემა Superdeporte.
აღნიშნული წყაროს ცნობით, როდრიგოს თამაში განსაკუთრებით “მარსელის” მთავარ მწვრთნელს მიჩელს მოსწონს და ზამთრის სატრანსფერო პერიოდში მის დამატებას შეეცდება.
21 წლის ფეხბურთელს ოქტომბრიდან მოყოლებული ნათამაშები არ ჰქონდა და მინდორზე მხოლოდ გასულ მატჩში (ჩემპიონთა ლიგაზე “ზენიტთან” 0:2 წაგებულ შეხვედრაში) გამოჩნდა, ისიც ბოლო 10 წუთით. ესპანური პრესა დე პაულის უთამაშებლობას ნუნუ ესპირიტო სანტოსთან ურთიერთობის გაფუჭებით ხსნის, თუმცა ამაზე არცერთი მხარე კომენტარს არ აკეთებს და როდრიგოს თქმით, ძირითადში დასაბრუნებლად იბრძოლებს.
არგენტინელის ამ განცხადების მიუხედავად, მას “მესტალიადან” წასვლას უწინასწარმეტყველებენ, ისევე როგორც ალვარო ნეგრედოს, რომელსაც ასევე ესპირიტოსთან კონფლიქტი აქვს და დე პაულის მსგავსად, მის სახელსაც “მარსელს” უკავშირებენ.
როდრიგომ მიმდინარე სეზონში მხოლოდ 6 შეხვედრა ჩაატარა.
