საქართველოს მოქმედი ჩემპიონის რუსთავის “ოლიმპის” პრეზიდენტმა ჟოზეფ ქეიმ, გუნდის მთავარ მწვრთნელ ნესტორ მუმლაძეს თანამდებობა დაატოვებინა.
“პირადად ქეისთან არ მისაუბრია. კლუბში გამომიცხადეს, რომ მან ჩემი დათხოვნის გადაწყვეტილება მიიღო” – განუცხადა “მსოფლიო სპორტს” მუმლაძემ, რომელმაც სამშაბათს ჩვეულებისამებრ ავარჯიშა გუნდი, მაგრამ საღამოს პოსტიდან გაათავისუფლეს.
მუმლაძესთან ერთად, “ოლიმპიდან” გაუშვეს მისი ასისტენტი ბორის გონჩაროვი და კლუბში სპორტულ კონსულტანტად მომუშავე იური გაბისკირია. ამ ეტაპზე გადაწყვეტილი არაა რუსთაველებს სათავეში ვინ ჩაუდგება, მაგრამ, შესაძლოა, დღის განმავლობაში ახალი მწვრთნელის ვინაობა გაირკვეს. არაა გამორიცხული დარჩენილ შეხვედრებში “ოლიმპს” არმაზ ჯელაძემ უხელმძღვანელოს, რომელიც მანამდე თემურ მახარაძის თანაშემწე იყო და მუმლაძის  სამწვრთნელო შტაბშიც მუშაობდა.
ნესტორ მუმლაძემ სეზონი ქუთაისის “ტორპედოს” დამრიგებლად დაიწყო, მაგრამ სექტემბრის ბოლოს გუნდი დატოვა. “ოლიმპს” ის სათავეში ოქტომბრის დასაწყისში ჩაუდგა და კლუბში ორი თვე გაატარა. მისი ხელმძღვანელობით რუსთაველებს ჩემპიონატში თამაში არ წაუგიათ, გუნდი, მხოლოდ გასულ კვირაში, “ზესტაფონთან” საქართველოს თასის 1/4-ფინალის პირველ შეხვედრაში სტუმრად 0:3 დამარცხდა.  “ოლიმპი”, ეროვნული ჩემპიონატის 17 ტურის შემდეგ, 34 ქულით სატურნირო ცხრილში მეორე ადგილზე იმყოფება.
შეგახსენებთ, რომ მუმლაძის გაშვებამდე, კლუბი დატოვა ვიცე-პრეზიდენტმა ზურაბ ჯაფარიძემ, რომელმაც წასვლის მიზეზად ქეისთან ფეხბურთზე განსხვავებული შეხედულება დაასახელა. ისე ახალი არავისთვისაა, რომ ბოლო პერიოდში ქეი რუსთაველთა ვარჯიშებს ხშირად ესწრება და გუნდის ყოველდღიურ ცხოვრებაშიც კორექტივები შეაქვს.     

ლაშა თაბაგარი