“სოსიედადის” ნიჭიერმა ნახევარმცველმა, სერხიო კანალესმა ჟურნალისტებთან საუბრისას აღნიშნა, რომ მის კლუბს ლა ლიგაში მაღალი მიზნები აქვს.
ბასკებმა სეზონი არასტაბილურად დაიწყეს და ევროპა ლიგის ფლეი-ოფში “კრასნოდართან” გამოვარდნენ. თუმცა, თამაში უმალ გამოასწორეს და მადრიდის “რეალის” დამარცხება მოახერხეს ჩემპიონატის მეორე ტურში. გასულ უქმეებზე კი, ვიგოში ბოლო წუთზე მოახერხეს “სელტასთვის” ქულის გამოგლეჯვა.
ახალგაზრდა ესპანელი დარწმუნებულია, რომ ზაფხულში განხორციელებული ტრანსფერები გუნდს სასიკეთოდ წაადგება. “ანოეტას” ბინადრებმა ჟერონიმო რული, ესტებან გრანერო და ალფრედ ფინბოგასონი დაიმატეს.
“იმედი გვაქვს, რომ ახალი მოთამაშეები გაგვაძლიერებენ. ბევრი უნდა ვიმუშაოთ და თამაშის ხარისხი გავაუმჯობესოთ. სწორ გზას ვადგავართ. გასულ ტურში, “ბადაილოსზე” ჩვენი ხასიათი ვაჩვენეთ და რთული შეხვედრა შემოვაბრუნეთ.
სეზონი ახლა დაიწყო და უფრო მოვუმატებთ. “სოსიედადს” სოლიდური მიზნები აქვს და ლა ლიგაში მაღალი ადგილის დაკავებას ვაპირებთ”, – განუცხადა ჟურნალისტებს სერხიო კანალესმა.
ირაკლი ალიმბარაშვილი
