ევროპის მე-15 ინდივიდუალური ჩემპიონატის უმთავრეს ფავორიტად რუსი ვალენტინა გუნინა (2501) იქცა, რომელმაც 8 ტურში 7.5 ქულა მოაგროვა და უახლოეს კონკურენტს უკვე ქულით უსწრებს.

საინტერესია, რომ გუნინამ ბულგარეთის ქალაქ პლოვდივში მიმდინარე ტურნირი ყაიმით გახსნა, შემდეგ კი მიჯრით 7 (!) პარტია მოიგო, მათ შორის 3 – ქართველ მოჭადრაკეებთან.

ვალენტინამ მერი არაბიძეს (2406) და საქართველოს ნაკრების ლიდერ ნანა ძაგნიძეს (2541) აჯობა, მე-8 ტურში კი ერთ-ერთ უმთავრეს კონკურენტ ლელა ჯავახიშვილსაც (2474) სძლია.

შედეგად, ჯავახიშვილმა 6.0 ქულით მე-4 ადგილზე გადაინაცვლა, მისდარი მონაგარი კი ნატალია ჟუკოვას (უკრაინა, 2451), ნინო ბაციაშვილს (2417), ტატიანა კოსინცევას (რუსეთი, 2476) და ელინა დანიელიანს (სომხეთი, 2458) გააჩნიათ. ბაციაშვილი შავებით კოსინცევას დაუზავდა და დამატებითი მაჩვენებლებით მეხუთეა.

გუნინას უახლოესი მდევარი კი სალომე მელია (2454) გახლავთ, რომელმაც თეთრი ფიგურებით რუსი ოლგა გირია (2493) დაამარცხა და თავი 6.5 ქულას მოუყარა. მე-9 ტურში მელია თეთრებით გუნინას ეთამაშება და გამარჯვების შემთხვევაში, ჩემპიონობაზე სერიოზულ განაცხადს გააკეთებს.

ევროპის ჩემპიონატზე კიდევ 6 ქართველი მოჭადრაკე თამაშობს, რომელთა მდგომარეობა ასეთია: 14. ნინო ხურციძე (2460) – 5.5; ...17. მერი არაბიძე – 5.5; 18. ნანა ძაგნიძე – 5.0; 37. სოფიო გვეტაძე (2356) – 4.5; 63. სოფიკო გურამიშვილი (2402) – 4.0; 108. მადონა ბოკუჩავა (2027) – 2.5;

როგორც აღვნიშნეთ, მე-9 ტურში პირველ დაფაზე მელია და გუნინა ითამაშებენ, სხვა საინტერესო წყვილები კი ასე გამოიყურება: ჯავახიშვილი – კოსინცევა, ბაციაშვილი – დანიელიანი, ჟუკოვა-ტრანგ ჰოანგი (უნგრეთი, 2490), არაბიძე-მარია მუზიჩუკი (უკრაინა, 2521), ხურციძე-ადრიანა ნიკოლოვა (ბულგარეთი, 2303), ირინა ბულმაგა (რუმინეთი, 2357)-ძაგნიძე.