„პარი სენ-ჟერმენის“ მთავარმა მწვრთნელმა ლუის ენრიკემ ევროპის სუპერთასზე „ასტონ ვილასთან“ მატჩის წინ პრესკონფერენცია გამართა.

ესპანელმა სპეციალისტმა აღნიშნა, რომ მათი მიზანი არ შეცვლილა - ისევ ყველაფრის მოგება სურთ.

„ვიწყებთ, ეს ოდნავ განსხვავებული და უჩვეულო წინასასეზონო პერიოდი იყო, ფეხბურთელები სხვადასხვა დროს ბრუნდებოდნენ. ბევრი მოთამაშე გვყავს, ვინც მსოფლიოს ჩემპიონატზე ითამაშა და ახლახან ჩამოდიან. ვცდილობთ, მთელი წლის განმავლობაში კონკურენტუნარიანი ვიყოთ და ოთხშაბათს დავიწყებთ. ყოველთვის რთულია იმის ცოდნა, თუ როგორ მატჩს ვითამაშებთ. ვეცდებით ბურთის კონტროლს. ეს რთული მატჩებია გასაკონტროლებლად, მაგრამ იმედი მაქვს, რომ ისეთივე კონკურენტუნარიანი ვიქნებით, როგორც გასულ სეზონში. ეს პირველი ოფიციალური მატჩია, მაგრამ ჩვენთვის მნიშვნელოვანია. ასევე გვინდა, რომ ჩვენს გულშემატკივრებთან ერთად კიდევ ერთი დაუვიწყარი წელი გვქონდეს.

ფერან ტორესი? მე არ ვსაუბრობ სატრანსფერო ბაზარზე, მხოლოდ პსჟ-ში მოთამაშე ფეხბურთელებზე. ესპანური ფეხბურთი უკვე რამდენიმე წელია უმაღლეს დონეზეა.

უეფასა და ინფანტინოს შორის კრიზისი? მაქვს ჩემი აზრი, მაგრამ ამაზე აქ არ ვისაუბრებ, შესაბამისი ადგილი არ არის. მე ჩემს ფეხბურთელებსა და ჩემს სამუშაოზე ვარ ორიენტირებული. უეფა და ინფანტინო პოლიტიკოსებისთვისაა და მე პოლიტიკოსი არ ვარ.

ზოგიერთი ფეხბურთელი მხოლოდ ამ ორშაბათს დაბრუნდა, ზოგი კი გასულ კვირას. ვცდილობთ, საუკეთესოდ მოვემზადოთ. არ ვიცი, ოთხშაბათს რა დონეზე იქნებიან ჩემი მოთამაშეები. ვეცდებით, ეს უმაღლესი დონის მატჩი მოვიგოთ.

რა თქმა უნდა, თავიდანვე ძალიან ამბიციური მიზნები დავისახეთ და ასე გავაგრძელებთ. ეს სხვა მომენტია და ახლა ყველას ჰგონია, რომ გამარჯვება ჯერ კიდევ შეგვიძლია. თუმცა, თეორია ასეთია: მოედანზე უნდა ვაჩვენოთ, რომ შესაბამისი დონე გვაქვს. კვლავ გამარჯვებას ვცდილობთ, მაგრამ ეს ადვილი არ არის, როგორც ისტორიამ აჩვენა.

თუ გავაანალიზებთ, თუ რა გავაკეთეთ ბოლო ორი წლის განმავლობაში, თითოეულმა მოწინააღმდეგემ თავისი დონე აჩვენა ჩვენი დამარცხებით. შევძელით ჩვენი გაუმჯობესების დემონსტრირება ყველა მატჩში. მთავარია, ვიყოთ არაპროგნოზირებადი მოწინააღმდეგისთვის. სწორედ ამისკენ ვისწრაფვით. ეს ჩვენთვის მნიშვნელოვანი იქნება სეზონის განმავლობაში. სეზონს იმავე სურვილით დავიწყებთ, რომ ტიტულები მოვიგოთ.

გასული სეზონი უჩვეულო იყო და წელსაც უჩვეულო იქნება. ვეცდებით, საუკეთესო დონეზე ვითამაშოთ, თუმცა ჩვენი მთავარი მიზანი სეზონის ბოლოს საუკეთესო ფორმაში ყოფნაა“, - თქვა ლუის ენრიკემ.

შეგახსენებთ, რომ „პარი სენ-ჟერმენი“ – „ასტონ ვილას“ მატჩი 12 აგვისტოს, თბილისის დროით 23:00 საათზე გაიმართება.