„ჯენოასა“ და „პერუჯას“ ყოფილმა მეკარე სიმონე ბრალიამ იტალიურ მედიასთან აურელიო დე ლაურენტისისა და ხვიჩა კვარაცხელიას შესახებ სენსაციური ინფორმაცია გაავრცელა.

როგორც მან თქვა, კვარაცხელია ინგლისურ კლუბში უკვე გაყიდულია, მაგრამ მეტი არაფერი უთქვამს:

„როდესაც მეწარმე მაქსიმალურ მოგებას ახორციელებს, ის საბოლოოდ ბიზნესს ყიდის. დე ლაურენტისი შეიძლება ამ ზაფხულს „ნაპოლის“ დაემშვიდობოს და ვიცი, რომ კვარაცხელია ინგლისში უკვე გაყიდულია“, - უთხრა მან TMW Radio-ს.

ამ ინფორმაციის საპირწონედ Area Napoli იტყობინება, რომ კვარაცხელიას მიმართ ინგლისიდან ინტერესი არსებობს, მაგრამ „ნაპოლი“ მის გაყიდვას ზაფხულში არ აპირებს და ეს გამორიცხულია. გამოცემამ უარყო დე ლაურენტისის კლუბის შესაძლო გასხვისებაც, პირიქით, წერს, რომ მან ჯერ უნდა კლუბის მმართველობა გააგრძელოს, მერე კი ეს საქმე შვილებს მიანდოს.

შეგახსენებთ, რომ ხვიჩა კვარაცხელიამ მიმდინარე სეზონში ყველა ტურნირზე ჩატარებულ 41 შეხვედრაში 14 გოლი გაიტანა, 14 საგოლე პასი გააკეთა და 5-ჯერ პენალტი მოიპოვა. მას კლუბთან კონტრაქტი 2027 წლის 30 ივნისამდე აკავშირებს.