იტალიური სერია A-ს მე-16 ტურში „ნაპოლისთან“ გამარჯვების შემდეგ (1:0), „ინტერის“ შემტევმა, მატჩის ერთადერთი გოლის ავტორმა, ედინ ჯეკომ ჟურნალისტებს უთხრა, რომ მისმა გუნდმა დამსახურებულად მოუგო ლიდერს.

„ეს იყო სამი ქულისთვის მატჩი. კარგად ვიცოდით, რომ „ნაპოლი“ შესანიშნავ ფეხბურთს აჩვენებს, თუმცა კომპაქტურად ვითამაშეთ და მეტოქეს, ფაქტობრივად, შანსი არ დავუტოვეთ. ჩვენ კი რამდენჯერმე კიდევ შეგვეძლო გატანა და საბოლოოდ დამსახურებულად გავიმარჯვეთ.

ჩემი საიდუმლო? ყოველდღიური მუშაობა. უშრომელად არაფერი გამოვა. 36 წლის ვარ, მაგრამ ისევ მინდა თამაში და გოლების გატანა.“ - ციტირებს ბოსნიელი ფორვარდის სიტყვებს fcinter1908.it.

მიმდინარე სეზონში ჯეკომ „ინტერის“ მაისურით ყველა ტურნირში 22 მატჩი ჩაატარა, 10 ბურთი გაიტანა და სამი საგოლე გადაცემა შეასრულა.