დღეს ესპანეთის ეროვნული ნაკრები ევროპის ჩემპიონატის შესარჩევი ეტაპის შეხვედრას სლოვაკეთში გამართავს. 2010 წლის მუნდიალის ჩემპიონებს ქალაქი ჟილინა უმასპინძლებს.

დელ ბოსკეს გუნდში მხოლოდ ერთი ცვლილება მოხდა. ტრავმირებული სერხიო რამოსი მარკ ბარტრამ ჩაანაცვლა. მარკ ბარტრას ეროვნულ ნაკრებში 2 მატჩი აქვს ჩატარებული. სადებიუტო 2013 წელს ეკვატორულ გვინეასთან ითამაშა.

1998 წლის მსოფლიო ჩემპიონატის შესარჩევ ციკლში ესპანეთი და სლოვაკეთი ერთ ჯგუფში მოხვდნენ. ტენერიფეში გამართული მატჩი მასპინძელთა გამარჯვებით დასრულდა (4:1). გოლები პიციმ, ამორმა, ლუის ენრიკემ და ფერნანდო იერომ გაიტანეს, ხოლო საპასუხო თამაშში სამი ქულა კვლავ პირინეს მკვიდრთ დარჩათ. ბრატისლავაში ესპანელთაგან კიკომ და ამორმა გამოიჩინეს თავი.

სლოვაკთა შორის რამდენიმე მოთამაშე მაღალი დონის ჩემპიონატში თამაშობს. მარეკ ჰამშიკი და იურაი კუჩკა იტალირ კლუბებში, შესაბამისად, “ნაპოლსა” და “ჯენოაში” თამაშობენ. “ჰერტაშია” პეტერ პეკარიკი, ხოლო “ფრაიბურგის” წევრია კერიმ გაიდე. უკვე წლებია “ლივერპულში” თამაშობს ცენტრალური მცველი მარტინ შკრტელი. ასე რომ, დღეს დელ ბოსკეს გუნდს რთული მატჩი ელის იან კოზაკის მოთამაშეებთან.