საქართველოს ეროვნული ლიგის 36-ე ტურში გორის „დილასა“ და წყალტუბოს „სამგურალს“ შორის კონფერენს ლიგის საგზურის მფლობელის ვინაობა გაირკვა.

მიზანს გორელებმა მიაღწიეს, რომელთაც მხოლოდ მოგება აწყობდათ და მოიგეს კიდეც. „დილა“ 31-ე წუთზე თორნიკე კაპანაძემ დააწინაურა, ხოლო მეორე ტაიმში ანდრეი დემჩენკოს გუნდმა უპირატესობა კიდევ უფრო გაიმყარა.

ტიერი გეილიმ და ნუგზარ სპანდერაშვილმა იმერული გუნდის დაცვაში არსებული სივრცეებით კარგად ისარგებლეს და „დილამ“ 3:0 მოიგო. „სამგურალს“ ამ შეხვედრაში ფრეც ხელს აძლევდა და უშანსოდ არ ყოფილა, საგოლე მომენტებიც შექმნა, მაგრამ ვერ გამოიყენა და მარცხი განიცადა.

შედეგად, გორის „დილა“ 59 ქულით მესამე ადგილზე გავიდა და ორი ქულით აჯობა „სამგურალს“. გორელები კონფერენს ლიგაზე ითამაშებენ, ისევე, როგორც „დინამო ბათუმი“, ხოლო „დინამო თბილისი“ ჩემპიონთა ლიგის საკვალიფიკაციო ეტაპზე გამოვა. კონფერენს ლიგის კიდევ ერთი საგზურის მფლობელის ვინაობა 7 დეკემბერს გაირკვევა, როცა თასის ფინალში „ტორპედო“ და „ლოკომოტივი 2“ შეხვდებიან.

გარდა ამისა, წინაა პლეი-ოფის მატჩები, რომელმაც ეროვნული ლიგისა და ეროვნული ლიგა 2-ის მომდევნო სეზონებისთვის შემადგენლობა უნდა დააკომპლექტოს. პლეი-ოფის მატჩები 7 და 12 დეკემბერს ჩატარდება.

„დილა“ – „სამგურალი“ 3:0 (1:0)

გოლები: 1:0 კაპანაძე (31), 2:0 გეილი (69), 3:0 სპანდერაშვილი (90)