საქართველოს ნაკრებისა და „ულსან ჰიუნდაის“ ფეხბურთელი ვაკო ყაზაიშვილი სკანდალში გაეხვა. ტელეკომპანია „ფორმულას“ ეთერში გავიდა სიუჟეტი, რომელშიც ქართველი ნახევარმცველის ცოლის ძმა ეროვნული ნაკრების ფეხბურთელებს და საქართველოს ფეხბურთის ფედერაციას ემუქრება, თუ ყაზაიშვილს ნაკრებში სათამაშო დრო არ ექნება.

აღნიშნულ სიუჟეთს გამოეხმარა თვითონ ყაზაიშვილი, რომელმაც სოციალურ ქსელში ვრცელი პოსტი დაწერა და თქვა, რომ მას არასდროს არავის დახმარება დასჭირვებია სათამაშოდ და მზადაა ფეხბურთის ფედერაციის ნებისმიერი გადაწყვეტილება მიიღოს.

„პირველ რიგში ქართველი ფეხბურთის ქომაგებს, საქართველოს ყველა მოქალაქეს ბოდიშს ვუხდი ფაქტისთვის, რომელიც ჩემთვის ყველაზე მეტად მიუღებელია. ფეხბურთის თამაში 7 წლის ასაკში დავიწყე. ყველამ, ვინც დღეს, ჩვენს დიდ საფეხბურთო ოჯახს წარმოადგენს იცის რამდენი შრომა ჩავდე ჩემი კარიერის შენებაში.

პირველად ნაკრებში 9 წლის წინ გამომიძახეს და ეს იყო ყველაზე მნიშვნელოვანი დღე ჩემს კარიერაში. ეროვნული ნაკრების გარეშე ფეხბურთელის კარიერული ცხოვრება სრულფასოვანი არასოდესაა. ყველა ფეხბურთელისთვის, ყველაზე მნიშვნელოვანი და ფასეული სწორედ ნაკრებია და მეც არ ვარ გამონაკლისი.

ცხოვრებაში არავინ დამჭირვებია მინდორზე მოსახვედრად. ყველამ, ვისაც ფეხბურთი უყვარს იცის, რომ ჩემს მიერ გატანილი გოლების და დაშვებული შეცდომების უკან მხოლოდ მე ვდგავარ. არავინ და არაფერი ჩემი შრომის და ფეხბურთის სიყვარულის გარდა.

ყველამ, ვინც წარმოადგენს ნაკრებს და ფედერაციას, იცის, რომ ეს ჩანაწერი ყველაზე ბოლომ მოვისმინე. თქვენთვის ამ ჩანაწერში ნაკრების წევრებზე საუბრობენ და ჩემთვის მეგობრებზე. ამიტომ განსაკუთრებით მძიმე და მიუღებელია საუბრის შინაარსი ჩემთვის.

ნაკრებს აქვს ისტორიული შანსი და ამ შანსის გამოსაყენებლად ყველაფერს გავიღებ. ყველანაირ პირადულ წინააღმდეგობას გადავლახავ. ჩემთვის მთავარია არ დაზარალდეს ჩვენი დიდი საფეხბურთო ოჯახი და ამიტომ მზად ვარ მივიღო ფედერაციის ნებისმიერი გადაწყვეტილება“, - დაწერა ყაზაიშვილმა.

შეგახსენებთ, რომ ვაკო ყაზაიშვილი საქართველოს ნაკრებში 2013 წლიდან თამაშობს და 63 მატჩში 13 გოლი აქვს გატანილი.