ცნობილმა პორტალმა Transfermarkt-მა ესპანეთის ლა ლიგაში მოთამაშე ფეხბურთელების სატრანსფერო ფასები განაახლა, რის შედეგადაც, „ვალენსიას“ ქართველი მეკარის, გიორგი მამარდაშვილის ღირებულება გაორმაგდა.

მამარდაშვილი აქამდე 10 მილიონ ევროდ იყო შეფასებული, ახლა კი მისი უკვე 20 მილიონი ევროა, რითაც საქართველოში ყველაზე ძვირადღირებული მოთამაშეა. მან ხვიჩა კვარაცხელიას გადაასწრო, რომელიც 15 მილიონ ევროდაა შეფასებული, თუმცა, ისიც აღსანიშნავია, რომ Transfermarkt-ი სერია A-ს ფეხბურთელების ფასებს მომდევნო კვირაში განაახლებს და დიდი ალბათობით, კვარაც გაძვირდება.

როგორც ვთქვით, ამ წუთისთვის მამარდაშვილი საქართველოში ფასის მიხედვით პირველ ადგილზეა, მსოფლიოს მასშტაბით მეკარეებს შორის მე-19(!), ლა ლიგაში 61-ე, „ვალენსიას“ ფეხბურთელებში მეოთხე, ზოგადად, მსოფლიოში 383-ე, ხოლო 2000 წელს დაბადებულ ფეხბურთელთა შორის მე-40 ადგილს იკავებს.

შეგახსენებთ, გიორგი მამარდაშვილმა მიმდინარე სეზონში ლა ლიგაში 6 მატჩი ჩაატარა, ორჯერ კარი მშრალად შეინახა, 5 გოლი გაუშვა და დარტყმების 78.3% მოიგერია.