უკრაინასთან მატჩის წინა დღეს საქართველოს კალათბურთელთა ეროვნულმა ნაკრებმა რიგის ოლიმპიურ ცენტრ Rimi-ში ივარჯიშა. ილის ზუროსის გუნდი მსოფლიო ჩემპიონატის საკვალიფიკაციო ტურნირის მატჩს 1 ივლისს, “რიგა არენაზე” გამართავს, სადაც წინა დღეს ლატვიამ სერბეთს უმასპინძლა და ამიტომ, უკრაინასაც და საქართველოსაც იქვე მდებარე ოლიმპიური ცენტრის დარბაზში მოუწია ვარჯიშმა.

როგორც ხდება ხოლმე, მატჩის წინა დღეს ილიას ზუროსმა გუნდი ძირითადად კომბინაციების დამუშავებაზე ავარჯიშა. ჩვენი გუნდის წევრები ხან ცალ ფარში, ხანაც მთელს მოედანზე ათამაშებდნენ ნაირგვარი სახის დაცვით და შეტევით კომბინაციებს. ვარჯიშმა დაახლოებით საათნახევარი გასტანა. ჩვენი ნაკრების წევრები სასურველ ფორმაში არიან. გიორგი ცინცაძე, რომელმაც მძიმე ტრავმა გადაიტანა და მთელი სეზონი გაუცდა, ფორმას სწრაფი ტემპებით უბრუნდება.

საქართველოს ნაკრები რომ ვარჯიშობდა, გვერდზე მდგარ მაყურებლებით მთლიანად სავსე “რიგა არენაზე” ლატვიამ სერბეთს თამაში შემოუტრიალა და საბოლოოდ დამაჯერებლად დაამარცხა. 1 ივლისს ეს ათიათასიანი არენა სავსე არ იქნება, როცა უკრაინა საქართველოს უმასპინძლებს. გამარჯვება ორივე გუნდს ჰაერივით სჭირდება, რადგან საკვალიფიკაციო ტურნირის მეორე ეტაპზე დამატებითი ქულები წაიყოლოს.

უკრაინისა და საქართველოს მატჩი “რიგა არენაზე” თბილისის დროით 20:00 საათზე დაიწყება და მის პირდაპირ ტრანსლაციას საზოგადოებრივი მაუწყებლის პირველი არხი შემოგთავაზებს. საქართველოს ნაკრები მატჩის შემდეგ პირდაპირ სამშობლოში გამოემგზავრება და 4 ივლისს, ახალაშენებულ “თბილისი არენაზე” ესპანეთს უმასპინძლებს.

GBF.GE