გიორგი მამარდაშვილის მშრალი სერია შეწყდა, მაგრამ ქართველი მეკარე „რაიო ვალეკანოსთან“ მოედანზე საუკეთესო იყო.

„ვალენსია“ რომ არ დამარცხდა, სწორედ გიორგის დამსახურებაა, რომელმაც დიდებული თამაში ჩაატარა და გუნდი გოლისგან არაერთხელ იხსნა. განსაკუთრებით სამ ეპიზოდში.

მამარდაშვილის მშრალი სერია მთლიანობაში 559 წუთს გაგრძელდა და ის „რაიოს“ ფეხბურთელმა სერხი გვარდიოლამ დაასრულა, რომელმაც მისი კარი ახლო მანძილიდან 83-ე წუთზე დალაშქრა და საბოლოო ანგარიში დააფიქსირა - 1:1. გოლში გიორგის ბრალი არ მიუძღვის, დაცვა აშკარად ჩავარდა და უყურადღებოდ მცველებმა ითამაშეს.

ცნობილმა გამოცემა As-მა მამარდაშვილის თამაში 9 ქულით შეაფასა, რაც ორივე გუნდში საუკეთესო შეფასება გახლდათ და აი, რას წერს აღნიშნული ვებგვერდი:

„ისის დღეს კოშმარები დაესიზმრება, ქართველს ვერავინ აჩერებს და მან ორი ძალიან მაგარი ბურთი მოიგერია, ორჯერვე ისის დარტყმული. პირველი დაბალი ტრაექტორიით, რომელზეც ვალენსიელმა მეკარემ რეაგირება მოასწრო, მეორე შორეული დარტყმა, როცა ლამაზი გოლი უნდა გასულიყო, ბურთი ქართულ კედელს შეეჯახა“.

შეგახსენებთ, გიორგი მამარდაშვილს მიმდინარე სეზონში 16 მატჩი აქვს ჩატარებული (14 ლა ლიგაში, 2 სამეფო თასზე) და 8-ჯერ კარი მშრალად შეინახა. მისი მშრალი სერია „ბარსელონასთან“ მატჩის 63-ე წუთიდან დაიწყო, შემდეგ მან გოლი არ გაუშვა „მალიორკასთან“, „ბილბაოსთან“, „ხეტაფესთან“, „ელჩესთან“, „კადისთან“ და „რაიო ვალეკანოსთან“ 83-ე წუთამდე.

„ვალენსია“ ლა ლიგაში 31 ტურის შემდეგ 42 ქულით მეცხრე ადგილზეა და მომდევნო შეხვედრას 16 აპრილს, შინ „ოსასუნასთან“ გამართავს.