რაგბი

14:05 | 8.12.2021 | ნანახია [] - ჯერ

სუპერ თასი | ‘თელავივ ჰითი’ ორ საშინაო თამაშს საქართველოში გამართავს

ისრაელის ფრენჩაიზი ‘თელავივ ჰითი’ ‘ლოკომოტივ-პენზასა’ და ‘ენისეი-სტმ’-ს საქართველოში, შესაბამისად – რუსთავსა და თბილისში უმასპინძლებს.

კალენდარში ცვლილებები კოვიდ-პანდემიის მორიგი ტალღითაა გამოწვეული. ვირუსის გავრცელების შემცირების მიზნით, ისრაელმა მთელი რიგი ქვეყნებისთვის რეგუალაციები გაამკაცრა, რის გამოც ‘ლოკომოტივი’ და ‘ენისეი’ იქ სათამაშოდ ჩასვლას ვერ ასწრებდნენ…

ასეთ პირობებში საქართველოს რაგბის კავშირმა ‘თელავივ ჰითს’ საშინაო შეხვედრების საქართველოში გამართვა შესთავაზა, რასაც როგორც ებრაული მხარე, ასევე მისი მოწინააღმდეგე კლუბები და რაგბი ევროპა, სიხარულით შეხვდნენ.

„ისრაელში დაწესებული შეზღუდვების გამო, ამ ორი მატჩის ჩატარებას საფრთხე დაემუქრა. ტურნირის დროში გაწელვა ჩვენს ინტერესებში არ შედის, რადგან ‘შავ ლომთან’ დაკავშირებით სხვა გეგმებიც გვაქვს. ჩვენ, როგორც რაგბი ევროპის წამყვანმა ქვეყანამ, ებრაელ მეგობრებს შევთავაზეთ, რომ საშინაო თამაშები საქართველოში ჩაეტარებინათ და მათ ორგანიზებას ჩვენ გავუკეთებდით. ამაზე სიხარულით დაგვთანხმა როგორც ‘თელავივი’, ასევე ‘ლოკომოტივი’ და ‘ენისეი’. თავის მხრივ, რაგბი ევროპამ არაერთხელ გამოხატა მადლიერება იმის გამო, რომ ტურნირის გაგრძელებას ჩვენი დახმარებით საფრთხე არ შეექმნა“ – ამბობს რაგბის კავშირის ვიცე-პრეზიდენტი ბაჩო ხურციძე.

ამრიგად, 10 დეკემბერს, 14 საათზე, ‘თელავივ ჰითი’ ‘ლოკომოტივ-პენზას’ რუსთავში უმასპინძლებს, ხოლო 15 დეკემბერს, 20 საათზე, ‘ენისეის’ „ავჭალაზე“ დაუხვდება.

‘შავი ლომი’ მორიგ თამაშს 11 დეკემბერს, 17 საათზე „ავჭალაზე“ გამართავს და ‘ენისეის’ უმასპინძლებს, 18 დეკემბერს კი ‘ჰითს’ ისრაელში ეწვევა, თუმცა არაა გამორიცხული, ეს შეხვედრაც თბილისში ჩატარდეს:

„თეორიულად შესაძლებელია, რომ 18 დეკემბრამდე ისრაელში შეზღუდვები დასრულდეს და ‘თელავივ ჰითთან’ თამაშიც ჯერჯერობით ისრაელშია დაგეგმილი. შესაბამისი დოკუმენტაცია უკვე გაგზავნილი გვაქვს და ხვალ ან ზეგ მივიღებთ პასუხს, გვიშვებენ თუ არა ისრაელში. თუ გამგზავრება ვერ მოხერხდა, ალტერნატივის სახით, ‘თელავივ ჰითთან’ გვაქვს შეთანხმება, რომ 18, ან 19 დეკემბერს თბილისში ვითამაშებთ, ოღნდ ეს თამაში მაყურებლის გარეშე ჩატარდება, რათა გამოირიცხოს გულშემატკივრის ფაქტორი და ორივე გუნდი თანაბარ პირობებში იყოს“ – დაამატა ხურციძემ.

ამასობაში უკვე გაირკვა იმ ორი გუნდის ვინაობა, რომლებიც ფლეი ოფში დასავლეთ კონფერენციიდან ითამაშებენ. ჯგუფური ეტაპის დასრულებამდე ერთი ტურით ადრე პირველი ადგილი პორტუგალიურმა ‘ლუზიტანუშმა’ გაინაღდა (24 ქულა), ესპანური ‘იბერიანსი’ კი 15 ქულით მეორე ადგილზეა.

0.162105