იტალიელმა ოლიმპიურმა ჩემპიონმა სოფია გოჯამ, კანადურ სამთო კურორტ ლეიკ ლუისში გამართულ დაშვების რბოლაში, თითქმის უშეცდმო ცდა შეასრულა და მსოფლიო თასის ახალ სეზონში, დაშვების პირველი რბოლის გამარჯვებული გახდა. მეორე და მესამე ადგილები, შესაბამისად ამერიკელმა ბრიზი ჯონსონმა და ავსტრიელმა მირიამ პუხნერმა დაიკავეს.

გოჯა გასულ სეზონში დაშვებაში ბროლის გლობუსს დაეუფლა. ეს მის კარიერაში მეორე გლობუსია. ლეიკ ლუისში მან ცდა წუთსა და 46.95 წამში შეასრულა და თითქმის წამნახევრით აჯობა ჯონსონს. 29 წლის იტალიელისთვის ეს კარიერაში მეცხრე მოგებული დაშვებაა.

გოჯა ბოლო 16 წელიწადში პირველი იტალიელი ქალი მოთხილამურეა, ვინც ლეიკ ლუისში დაშვების რბოლის მოგება შეძლო. 2005 წელს კანდურ სამთო კურორტზე გამარჯვება ელენა ფანჩინიმ მოიპოვა.

რბოლის შემდეგ მან განაცხადა, რომ დაძაბულ პაექრობას ელოდა, მაგრამ თავის კარიერაში ყველაზე დიდი სხვაობით მოიგო. კვირას ქალ მოთხილამურეებს იქვე დაშვების კიდევ ერთი რბოლა ელით.

მხოლოდ 26-ე ადგილს დასჯერდა ამერიკელი მიკაელა შიფრინი, ვისაც ამერიკელთაგან ლეიკ ლუისში რბოლა ბოლოს, 2017 წელს აქვს მოგებული. ის გამარჯვებულს სამ წამზე მეტით ჩამორჩა.