ფეხბურთი

15:35 | 4.12.2021 | ნანახია [] - ჯერ

კრისტალბეთ ეროვნული ლიგის ბოლო ტური: "ტორპედომ", "თელავმა" და "საბურთალომ" მოიგეს

საქართველოს კრისტალბეთ ეროვნული ლიგის 2021 წლის სეზონის ბოლო ტურის სამი მატჩი გაიმართა, რომელთაც პრაქტიკული მნიშვნელობა არ ჰქონდა, რადგან სატურნირო ცხრილში ისედაც ყველაფერი გარკვეული იყო.

ქუთაისის „ტორპედომ“ იმერულ დერბიში წყალტუბოს „სამგურალი“ 4:1 დაამარცხა და პლეი-აუტის წინ კარგი ხასიათი შეიქმნა. გა ცეცაძის გუნდმა საბოლოოდ, ეროვნული ლიგა 40 ქულით მერვე ადგილზე დაასრულა და ერთადერთი ქულით ჩამორჩა „სამგურალს“, რომელსაც 41 ქულით მეშვიდე ადგილი ერგო. თუმცა, ახლა ორივე გუნდს წინ ყველაზე მნიშვნელოვანი მატჩები ელოდება - „სამგურალი“ 8 დეკემბერს საქართველოს თასის ფინალში „საბურთალოს“ შეხვდება, ხოლო „ტორპედო“ ლიგაში ადგილის შესანარჩუნებლად მარტვილის „მერანს“ შეხვდება.

„თელავმა“ სეზონი მაჟორულ ნოტაზე დაასრულა და საკუთარ კედლებში ქობულეთის „შუქურას“ 2:1 მოუგო. კახურ გუნდს 44 ქულით მეექვსე ადგილი ერგო და ზედიზედ მეორედ შეინარჩუნა ადგილი უმაღლეს ლიგაში. „შუქურა“ 27 ქულით მეცხრე პოზიციაზე გავიდა და პლეი-აუტში მისი მეტოქე „გაგრა“ იქნება. ასე გაირკვევა გიორგი შაშიაშვილის გუნდის ბედი.

თბილისის „საბურთალომ“ „სამტრედიას“ 5:1 აჯობა. სტუმართა მხრიდან ერთადერთი გოლი გიორგი არაბიძის ანგარიშზეა. მოგეხსენებათ, „სამტრედია“ 21 ქულით ბოლო, მეათე ადგილზე გავიდა და დაქვეითდა, ხოლო „საბურთალომ“ 57 ქულით მეოთხე ადგილი დაისაკუთრა. თუმცა, ლევან კორღალიძის გუნდს სეზონის მთავარი მატჩი წინ აქვს და საქართველოს თასის ფინალში „სამგურალს“ დაუპირისპირდება.

„ტორპედო“ – „სამგურალი“ 4:1 (3:0)

გოლები: 1:0 ზიდანი (28), 2:0 ბუკასი (31), 3:0 ზიდანი (44), 3:1 მირცხულავა (62, ა.გ), 4:1 ახვლედიანი (68)

„თელავი“ – „შუქურა“ 2:1 (0:1)

გოლები: 0:1 აფხაზავა (27), 1:1 შერგელაშვილი (82), 2:1 რუხაძე (87)

„საბურთალო“ – „სამტრედია“ 5:1 (1:1)

გოლები: 1:0 ნონიკაშვილი (16), 1:1 არაბიძე (30), 2:1 გულიაშვილი (51), 3:1 მალი (54), 4:1 ნონიკაშვილი (67), 5:1 მამაგეიშვილი (80)

0.134537