კალათბურთი

10:22 | 29.11.2021 | ნანახია [] - ჯერ

სანდრო მამუკელაშვილის 2 ქულა და გოგა ბითაძის 1 მოხსნა: "მილუოკიმ" "ინდიანა" დაამარცხა (+VIDEO)

NBA-ში გოგა ბითაძის და სანდრო მამუკელაშვილის გუნდების დაპირისპირება შედგა, მაგრამ ქართველმა კალათბურთელებმა ძალიან მცირე სათამაშო დრო მიიღეს - ბითაძემ 5 წუთზე ოდნავ მეტი და მამუკელაშვილმა სამი წუთი.

შეხვედრა დაძაბული გამოდგა და „ბაქსმა“ 118:100 მოიგო. გარდამტეხი მესამე პერიოდი იყო, რომელიც სტუმრებმა 12 ქულით მოიგეს და მატჩის ბედიც სწორედ მაშინ გადაწყდა.

ქართველი კალათბურთელები თამაშში მხოლოდ მატჩის ბოლოს ჩაერთვნენ, როცა შედეგი უკვე გადაწყვეტილი იყო. ბითაძემ 5:27 წუთში ერთადერთი მოხსნის დაგროვება მოასწრო, 1 სამქულიანი კი არაზუსტად ისროლა. აღსანიშნავია, რომ მიმდინარე სეზონში ამ გუნდების პირველ შეხვედრაში გოგას 18 წუთი დაუთმეს და მაშინ ნაყოფიერი თამაშიც ჩაატარა. ამჯერად კი, ქართველ ცენტრს ბევრი სათამაშო დრო არ მიუღია.

სანდრო მამუკელაშვილმა პარკეტზე 3:24 წუთი გაატარა და ხსენებულ დროში 2 ქულა და 2 მოხსნა (1 მეტოქის ფარზე) მიითვალა. სანდრომ ერთი ორქულიანი ისროლა და ბურთი მეტოქის კალათში მოათავსა.

„მილუოკიში“ საუკეთესო იანის ანტენტონკუმპო იყო, რომლის ანგარიშზე 26 ქულა, 13 მოხსნა და 3 პასი გახლდათ, ხოლო ჯრუი ჰოლიდეიმ 23 ქულას 7 მოხსნა და 9 პასი დაამატა. „ინდიანაში“ კარის ლევერტი 23 ქულით და 2 მოხსნით გამოირჩა.

„ინდიანა პეისერსი“ აღმოსავლეთ კონფერენციაში 9 მოგებით და 13 წაგებით მე-13 ადგილზეა, მომდევნო შეხვედრას კი 30 ნოემბერს, სტუმრად „მინესოტასთან“ გამართავს. „მილუოკი“ ამავე კონფერენციაში 13 გამარჯვებით და 8 მარცხით მეხუთე საფეხურზეა, ხოლო 2 დეკემბერს, „შარლოტ ჰორნეტსს“ უმასპინძლებს.

0.143445