NBA-ში ზედიზედ მეხუთე შეხვედრა მოიგო „მილუოკი ბაქსმა“, რომელსაც სანდრო მამუკელაშვილი დაუბრუნდა. ქართველმა კალათბურთელმა მოქმედ ჩემპიონ გუნდში 2:45 წუთი ითამაშა, რა დროშიც 1 დაფარება მოასწრო. 22 წლის შემტევმა 1 პეერსონალური ფოლიც მიიღო და ერთჯერ სამქულიანიც ისროლა, თუმცა არაზუსტად.

სანდროს მცირე დროის მიუხედავად, სასიამოვნო ფაქტია ის, რომ გუნდმა მისი დაბრუნება გადაწყვიტა, რადგან მამუმ განვითარების ლიგაში 2 შეხვედრა საკმაოდ მაღალ დონეზე ჩაატარა. ბოლო მატჩშიკი 22(!) ქულა ჩააგდო.

რაც შეეხება უშუალოდ შეხვედრას, ბუდენჰოლცერის გუნდმა უპირატესობა თავიდანვე მოიპოვა და მის გაზრდას ყოველ პერიოდში ახერხებდა. პირველი ნახევარი გუნდებმა ერთნაირი ანგარიშებით ითამაშეს და „ბაქსი“ შესვენებაზე 12-ქულიანი უპირატესობით გავიდა. (32:26, 32:26) 64:52. ხოლო მეორე ტაიმში „მილუოკიმ“ 24:22 და 26:19 მოიგო და საერთო ჯამში 21-ქულიანი სხვაობით - 114:93 იმარჯვა.

მატჩში 3 საუკეთესო შედეგი „მილუოკის“ კალათბურთელებს ჰქონდათ. ყველაზე შედეგიანი კი ტრადიციულად იანის ანტეტოკუმპო იყო. ბერძენმა კალათბურთელმა 31:10 წუთში 33 ქულა, 7 მოხსნა, 5 პასი და 2 დაფარება მიითვალა. მისი +- მაჩვენებელი კი 25-ს გაუტოლდა და მხოლოდ თანაგუნდელ ჰოლიდეის ჩამორჩა.

ერთადერთი ორმაგი დუბლი ბობი პორტისს ჰქონდა. 26 წლის ამერიკელმა ფორვარდმა 28 ქულას, 10 მოხსნასა და 1 პასს მოუყარა თავი. ხოლო ჯრუ ჰოლიდეი 22 ქულით, 8 მოხსნითა და 6 შედეგიანი გადაცემით გამოირჩა. მისი მარგი ქმედების კოეფიციენტი 29-ს გაუტოლდა და ეს საუკეთესო შედეგი იყო.

დამარცხებულთა რიგებში ტრეი ლაილსი გამოირჩა. კანადელმა კალათბურთემა საკუთარ გუნდს 19 ქულა და 7 მოხსნა შესძინა. 13 ქულა, 7 მოხსნა და 1 პასი გამოიმუშავა სადიკ ბეიმ.

„მილუოკის“ 19 შეხვედრაში 11 მოგების წილ 8 მარცხი აქვს და წინ მიიწევს. სანდრო მამუკელაშვილის გუნდი აღმოსავლეთ კონფერენციაში მე-6 ადგილზეა და შემდეგ შეხვედრას 27 ნოემბერს, „დენვერ ნაგეთსის“ წინააღმდეგ ჩაატარებს. „დეტროიტ პისტონსი“ კი 14 მარცხითა და მხოლოდ 4 გამარჯვებით მე-14 ადგილზეა და მხოლოდ „ორლანდო მეჯიქს“ უსწრებს. ზედიზედ 4 მარცხის შემდეგ დუეინ ქეისის გუნდი 26 ნოემბერს,, „ლოს ანჯელეს კლიპერსს“ დაუპირისპირდება.