ამსტერდამის „აიაქსის“ თავდამსხმელი სებასტიან ალე ჩემპიონთა ლიგის ისტორიაში შევიდა. კოტ დივუარელმა მიმდინარე სეზონი წარმოუდგენლად დაიწყო და ხუთ ტურში 9 გოლი გაიტანა!
აღსანიშნავია, რომ ჩემპიონთა ლიგაზე მანამდე მას არასდროს ჰქონდა ნათამაშები და ტურნირის ისტორიაში პირველი მოთამაშე გახდა, ვინც საწყის ხუთ შეხვედრაში 9 გოლი გაიტანა. ალემ ერლინგ ჰოლანდის რეკორდი გააუმჯობესა, რომელმაც ორი წლის წინ საწყის ხუთ თამაშში მეტოქეთა კარი 8-ჯერ დალაშქრა.
გარდა ამისა, ალესანდრო დელ პიეროს (1995 წელი), დიეგო კოშტასა (2013) და ერლინგ ჰოლანდის (2019) შემდეგ ალე მხოლოდ მეოთხე ფეხბურთელია ისტორიაში, ვინც ჩემპიონთა ლიგის საწყის 5 მატჩში მოედანი უგოლოდ არ დატოვა.
„აიაქსის“ ფორვარდს მორიგი ბენეფისი სტამბოლში „ბეშიქთაშთან“ ჰქონდა და მისი გოლებით ამსტერდამელებმა 2:1 მოიგეს, რის შედეგადაც ჯგუფში პირველი ადგილი გაინაღდეს.
