კვიპროსის ჩემპიონატის მეექვსე ტურში ნიქოზიის „აპოელის“ ქართველმა ფეხბურთელმა თორნიკე ოქრიაშვილმა გოლი გაიტანა.

ქართველების გუნდმა საკუთარ მოედანზე „ეთნიკოს ახნასს“ უმასპინძლა და დაძაბულ ბრძოლაში 2:1 დაამარცხა. ანგარიში პირველი ტაიმის ბოლოს, მსაჯის მიერ კომპენსირებულ მეორე წუთზე ოქრიაშვილმა გახსნა, რომელმაც საჯარიმო დარტყმით გაიტანა. პოზიცია ისეთი იყო, ყველა ჩაწოდებას ელოდებოდა, მაგრამ თორნიკე მახვილ კუთხეს არ შეუშინდა და ულამაზესი დარტყმით თანაგუნდელები დააწინაურა. „ოქრიმ“ „აპოელის“ მაისურით მეხუთე მატჩში სადებიუტო გოლი გაიტანა. გავიხსენოთ, რომ მან საქართველოს ნაკრების რიგებში კოსოვოსაც გაუტანა.

მეორე ტიამში „ახნასმა“ 81-ე წუთზე გაათანაბრა, ხოლო 87-ე წუთზე ანდრეას კარომ ნიქოზიელებს უმნიშვნელოვანესი გამარჯვება მოუტანა. ამ შეხვედრაში თორნიკე ოქრიაშვილმა შეუცვლელად ითამაშა, მურთაზ დაუშვილი 48-ე წუთზე შეცვალეს, რისი მიზეზიც ტრავმა იყო, მაგრამ ჯერ უცნობია რამდენად სერიოზულია დაზიანება, ხოლო გიორგი ქვილითაიამ მოედანი 78-ე წუთზე დატოვა.

„აპოელს“ 6 ტურში 6 ქულა აქვს მოპოვებული (2 მოგება, 4 წაგება) და სატურნირო ცხრილში მეათე ადგილზეა, მომდევნო ტურში კი 24 ოქტომბერს, სტუმრად „არისს“ შეხვდება.