სხვა

22:56 | 17.10.2021 | ნანახია [] - ჯერ

IOC-ის ათლეტთა კომისიამ ეროვნული ოლიმპიური კომიტეტების წარმომადგენლებთან პეკინი-2022 განიხილა

საერთაშორისო ოლიმპიური კომიტეტის (IOC) ათლეტთა კომისიამ ეროვნული ოლიმპიური კომიტეტების წარმომადგენლებთან ტელეკონფერენეცია გამართა. დისტანციური კავშირის მიზეზი პეკინის ზამთრის ოლიმპიური თამაშები იყო, რომელიც სტარტს აიღებს 2022 წლის 4 თებერვალს და 20 თებერვლამდე გასტანს.

ტელეკონფერენციაში მონაწილეობა მიიღეს IOC-ის პრეზიდენტმა თომას ბახმა და IOC-ის საკოორდინაციო კომისიის ხელმძღვანელმა ხუან ანტონიო სამარანჩმა, რომლებმაც თამაშებისთვის სამზადისზე ისაუბრეს. როგორც აღინიშნა, მრავალრიცხოვანი თხოვნის შემდეგ, პეკინი-2022-ის ორგანიზატორებმა დამატებითი აკრედიტაციები გამოჰყვეს ათლეტთა დამხმარე პერსონალისთვის.

გარდა ამისა, ეროვნული ოლიმპიური კომიტეტების და საერთაშორისო სპორტულ ფედერაციათა წარმომადგენლებმა განიხილეს შეჯიბრებების დროს ინტერნეტთან თავისუფალი წვდომის, მონაწილეთა PCR ტესტირების და ოლიმპიურ თამაშებზე კვალიფიკაციის საკითხები.

IOC-ის წარმომადგენელთა თქმით, ყველა ვაქცინა, რომელიც ჯანდაცვის მსოფლიო ორგანიზაციის ან ცალკეული ქვეყნების მიერ არის აღიარებული, სადაც კი მასობრივი ვაქცინაცია მიმდინარეობს, ჩინეთში ჩასულებს საშუალებას მისცემს უმალ მოხვდნენ ოლიმპიურ პერიმეტრში.

დღესდღეობით პეკინის ზამთრის ოლიმპიური თამაშებისთვის ლიცენზიათა 22 პროცენტია გათამაშებული, მათი მფლობელები კი 66 ქვეყნის ეროვნული ოლიმპიური კომიტეტების წარმომადგენლები არიან.

GEONOC.ORG.GE

0.122385