ძიუდო

20:33 | 17.10.2021 | ნანახია [] - ჯერ

ონისე სანებლიძის ბრინჯაო: საქართველომ პარიზის გრანდ სლემი 4 მედლით დაასრულა

პარიზის გრანდ სლემი საქართველომ ოთხი მედლით დაასრულა. ბოლო მედალი ონისე სანებლიძის ანგარიშზეა, რომელიც ბრინჯაოს დაეუფლა.

100 კგ წონით კატეგორიაში სანებლიძემ საფრანგეთის სახელით მოასპარეზე ხამზატ საპარბაევი დაამარცხა, მაგრამ შემდეგ რუმინელ ეშლი გონსალესთან მარცხი განიცადა და რეპეშაჟში გადაინაცვლა, სადაც კიდევ ერთ ფრანგ კლემენ დელვერს შეხვდა და ოქროს ქულით დაამარცხა. ამრიგად, მან ბრინჯაოს მედლისთვის იბრძოლა და ხორვატ ზლატკო კუმრიჩს გაეჯიბრა. ქართველი ძიუდოისტის უპირატესობა აშკარა იყო და 45 წუთში ორი ვაზარი გაახერხა, შედეგად, იპონით მოიგო და საქართველოს მეოთხე მედალი შესძინა.

90 კგ წონით კატეგორიაში ლუკა მაისურაძე რუს დავიდ ოგანისიანს მოუგო, ხოლო იაპონელ კენტა ნაგასავასთან წააგო და რეპეშაჟში გადაერთო, რომლის პირველ წრეში ავსტრიელ ვახიდ ბორჩაშვილს გაეჯიბრა, რომელსაც ვაზარით სძლია და ბრინჯაოს მედლამდე ერთადერთი გამარჯვება აშორებდა. ლუკას მომდევნო მეტოქე ფრანგი ალექსის მატეუ გახლდათ, რომელიც შებოჭა და იპონით იმარჯვა. ამავე წონაში მეორე ბრინჯაოს მედალი ანრი ეგუტიძემ მოიპოვა, რომელიც პორტუგალიის სახელით ასპარეზობს.

81 კგ წონით კატეგორიაში გრიგალაშვილმა მონღოლი მურენტსენ ბატულგა და ფრანგი ტიზი გნამიენს მოუგო, შედეგად ნახევარფინალში გავიდა და იქ იაპონელ სოტარო ფუჯივარასთან ვაზარით დაწინაურდა და მოპოვებული უპირატესობა ბოლომდე შეინარჩუნა, შედეგად, ფინალში გავიდა. ტატო ფინალში კიდევ ერთ იაპონელ მეტოქეს, ტაკეში სასაკის შეხვდა, მაგრამ წუთსა და 17 წამში ორი ვაზარით, შესაბამისად იპონით წააგო.

პარიზის გრანდ სლემზე კიდევ ერთი ბრინჯაოს მედალი ეთერ ლიპარტელიანის (57 კგ) აქტივშია, რომელმაც შაბათს იასპარეზა. აღსანიშნავია, რომ პარიზში სულ ოთხი ქართველი გამოვიდა და როგორც ხედავთ, ყველა მათგანმა მედალი მოიპოვა.

0.149705