აზიის ჩემპიონთა ლიგის მეოთხედფინალში ვაკო ყაზაიშვილმა გოლი გაიტანა, „ულსან ჰიუნდაი“ კი ნახევარფინალში გავიდა.

ქართველი ფეხბურთელის გუნდი ასევე სამხრეთკორეულ „იეონბუკს“ დაუპირისპირდა და დაძაბულ ბრძოლაში, დამატებით დროში 3:2 დაამარცხა. ანგარიში სწორედ ყაზაიშვილმა გახსნა, რომელმაც თავი მე-13 წუთზე გამოიჩინა. ჩვენებურმა რამდენიმე მეტოქე მოატყუა და ეფექტური გოლი გაიტანა. სხვათა შორის, აზიის ჩემპიონთა ლიგის ოფიციალურმა გვერდმა ამ გოლის ვიდეო სოციალურ ქსელში ატვირთა და სადაც წერია, რომ ვაკომ დიდებული გიორგი ქინქლაძის სტილში მაგიური გოლი გაიტანა.

ამის შემდეგ ანგარიში გათანაბრდა, მერე კვლავ „ულსანი“ დაწინაურდა, ხოლო მეორე ტაიმის დასაწყისში წონასწორობა კიდევ ერთხელ აღდგა და ძირითად დროში არაფერი შეცვლილა. დამატებით დროში, 101-ე წუთზე კი „ულსანმა“ გამარჯვების გოლი გაიტანა. ვაკო 109-ე წუთზე შეცვალეს. ქართველ ნახევარმცველს აზიის ჩემპიონთა ლიგის მიმდინარე სეზონში 7 მატჩში 4 გოლი დაუგროვდა. გარდა ამისა, სამხრეთ კორეის ჩემპიონატში 28 შეხვედრაში 8 გოლი აქვს გატანილი.

„ულსან ჰიუნდაი“ აზიის ჩემპიონთა ლიგის მოქმედი ჩემპიონია, ნახევარფინალში კი მის გარდა, „პოჰანგი“, „ალ-ნასრი“ და „ალ-ჰილალი“ ითამაშებენ. "ულსანის" მეტოქე "პოჰანგი" იქნება, რომელიც სამხრეთკორეული გუნდია.