ფეხბურთი

0:47 | 26.09.2021 | ნანახია [] - ჯერ

ხოსე ბორდალასი: "მამარდაშვილმა მოლოდინს გადააჭარბა, მაგრამ ემოციური ასპექტიც მნიშვნელოვანია"

ესპანური "ვალენსიას" მთავარმა მწვრთნელმა ხოსე ბორდალასმა გიორგი მამარდაშვილი ლა ლიგის მეშვიდე ტურში "ბილბაოსთან" (1:1), სათადარიგო სკამზე დატოვა. მან ამჯერზე არჩევანი იასპერ სილესენის სასარგებლოდ გააკეთა, მაგრამ "ღამურებმა" მაინც ვერ იმარჯვეს და მსაჯის მეხუთე კომპენსირებულ წუთზე გაიტანეს გამათანაბრებელი გოლი.

მატჩის შემდეგ ბორდალასმა პრესკონფერენცია გამართა, სადაც სილესენისა და მამარდაშვილის შესახებ მოუწია კომენტარის გაკეთება. როგორც ესპანელმა თქვა, გიორგის დიდი მომავალი აქვს, მაგრამ ახლა ცვლილების დრო იყო.

„გიორგიმ მართლაც კარგად ითამაშა. იცით, როგორ მოვიდა ჩვენთან და თავდაპირველ მოლოდინს გადააჭარბა. ალბათ, დატვირთვამ და პასუხისმგებლობამ მასზე ბოლო თამაშებში რაღაც მომენტში იმოქმედა. ის ძალიან ახალგაზრდა ბიჭია, რომელსაც დიდი მომავალი აქვს და ორი წაგების შემდეგ გვჯეროდა, რომ სილესენზე გადასვლის დრო იყო, რომელმაც შესანიშნავად ითამაშა, კარგი სეივები შეასრულა, განსაკუთრებით ბოლო წუთზე. ზოგჯერ არა მარტო სპორტული, არამედ ემოციური ასპექტიც ფასდება. გვჯეროდა, რომ შესაფერისი მომენტი იყო“, - თქვა ბორდალასმა.

შეგახსენებთ, გიორგი მამარდაშვილმა მიმდინარე სეზონში ლა ლიგაში ექვსი მატჩი ჩაატარა, ორჯერ კარი მშრალად შეინახა და 7 გოლი გაუშვა. მანამდე 20 წლის ქართველმა მეკარემ თავი პრესეზონის მატჩებში კარგი თამაშითაც გამოიჩინა. "ვალენსია" 11 ქულით მეხუთე პოზიციაზეა და მომდევნო ტურში 2 ოქტომბერს, "კადისს" სტუმრად შეხვდება.

0.12271