ფეხბურთი

2:38 | 20.09.2021 | ნანახია [] - ჯერ

AS მამარდაშვილზე: "კარიდან გამოსვლის დრო ცუდად შეარჩია და ბენზემამ არ აპატია"

ესპანეთის ლა ლიგის მეხუთე ტურში „ვალენსიამ“ მადრიდის „რეალს“ უმასპინძლა და მატჩის მიწურულს გაშვებული გოლებით 1:2 დამარცხდა. ავტორიტეტულმა გამოცემა As-მა „ლოს ჩეს“ ფეხბურთელების თამაში შეაფასა, მათ შორის, მამარდაშვილისაც.

„ქართველი მეკარის პირველი დიდი გამოცდა „ვალენსიას“ მაისურით, რომელშიც ის ძირითადად დარტყმების დაბლოკვებით იყო დაკავებული. ჯერ აზარის ცენტრში დარტყმა, მერე ვალვერდეს და შემდეგ ბენზემას, როდესაც გოლისგან გუნდი კარგი პოზიციით იხსნა. თუმცა, გოლები მაინც გავიდა. პირველში ვერაფერი შეძლო ფულკიეს რიკოშეტის გამო და მეორე გოლში გამოსვლის დრო ცუდად შეარჩია და ბენზემამ არ აპატია“, - წერს ცნობილი ესპანური გამოცემა.

შეგახსენებთ, გიორგი მამარდაშვილმა ლა ლიგის ხუთ მატჩში მიიღო მონაწილეობა, 4 გოლი გაუშვა, ორჯერ კარი მშრალად შეინახა და „მესტალიაზე“ გოლები პირველად გაუშვა. „ვალენსიას“ ხუთ ტურში 10 ქულა აქვს და მომდევნო მატჩს 22 სექტემბერს, სტუმრად „სევილიასთან“ გამართავს.

0.132349