„პარი სენ ჟერმენში“ ლიონელ მესიმ, კილიან მბაპემ და ნეიმარმა ერთად პირველად ითამაშეს, მაგრამ ფრანგულმა გუნდმა ბელგიაში „ბრიუგეს“ ვერ მოუგო (1:1). მაურისიო პოჩეტინოს გუნდი უფრო ახლოს წაგებასთან იყო, ვიდრე მოგებასთან, ხოლო არგენტინელი სპეციალისტი ფიქრობს, რომ გუნდს მეტი დრო სჭირდება.

“არ ვფიქრობ, რომ პრობლემა შემტევი ტრიო იყო, მგონია, რომ უფრო სოლიდურები უნდა ვიყოთ. როდესაც ვერ იმარჯვებ, ეძებ არგუმენტს, რათა ხაზი გაუსვა ნაკლებად პოზიტიურ ასპექტებს.

ნათელია, რომ მესი და მთლიანად გუნდი კმაყოფილი არ არის, იმის გათვალისწინებით, რომ პსჟ-ს მიზანი ყოველთვის გამარჯვებაა. უნდა მოვიგოთ მატჩები და უკეთ ვითამაშოთ. დრო გვჭირდება, რომ შეთამაშება უკეთ მოვახერხოთ, ეს აშკარაა და გასულ დღეებშიც ვთქვი. უფრო მეტად გუნდი უნდა გავხდეთ“, - თქვა პოჩეტინომ.

შეგახსენებთ, რომ ჩემპიონთა ლიგის მეორე ტურში „პარი სენ ჟერმენი“ 28 სექტემბერს, საკუთარ მოედანზე „მანჩესტერ სიტის“ დაუპირისპირდება.