სხვა

23:53 | 31.07.2021 | ნანახია [] - ჯერ

პლესნოი: "ტრავმამ ხელი შემიშალა, მომდევნო ოლიმპიადაზე ვეცდები საქართველოს ოქრო მოვუტანო"

ანტონ პლესნოიმ ბრინჯაოს მედლის მოპოვების შემდეგ კომენტარი გააკეთა. როგორც მან განაცხადა, ტრავმამ არ მისცა საშუალება, რომ თავისი პოტენციალი ბოლომდე ეჩვენებინა, მაგრამ მომდევნო ოლიმპიადაზე ოქროს მოგებას ეცდება.

„დიდი მადლობა საქართველოს, მადლობა ყველა გულშემატკივარს, ვინც მხარს მიჭერდა. ვეცადე მაქსიმუმი გამეღო, სამწუხაროდ ტრავმამ, რომელიც 5 დღის წინ მივიღე, არ მომცა საშუალება მთლიანად მეჩვენებინა ჩემი პოტენციალი. მადლობა ექიმებს, გიორგი ჭინჭარაულს, ზურაბ კახაბრიშვილს, რომელთა დახმარებით შევძლები კილოგრამების აწევა. აკვრაში პირველი მოძრაობის შემდგე უბრალოდ არ ვიცოდი, რა უნდა გამეკეთებინა, რომ საქართველოსთვის მედალი მომეპოვებინა. თუმცა თავს უფლებას ვერ მივცემდი, რომ საქართველოსთვის მედალი არ მომეტანა, თუნდაც მუხლი დამმსხვრეოდა და სერიოზული ტრავმა მიმეღო. მადლობა ფედერაციას, ჩემს პირად მწვრთნელს, გიორგი ასანიძეს, რომელმაც ყველაფერი გააკეთა და სულს დებს საქმეში. მომდევნო ოლიმპიადაზე ყველაფერს გავაკეთებ ოქროს მედლის მოსაპოვებლად“ - თქვა პლესნოიმ.

შეგახსენებთ, საქართველოს დელეგაციის ყულაბაში ამ დროისთვის უკვე 5 მედალია - 1 ოქრო, 3 ვერცხლი და 1 ბრინჯაო. ანტონ პლესნომდე მედლები ძიუდოისტებმა მოიპოვეს: ლაშა ბექაურმა ოქრო, ვაჟა მარგველაშვილმა, ლაშა შავდათუაშვილმა და გურამ თუშიშვილმა ვერცხლის მედლები.

ძალოსნობაში საქართველოს ტოკიოში კიდევ ერთი წარმომადგენელი ჰყავს, მთავარი იმედი ლაშა ტალახაძე, რომელიც 4 აგვისტოს იასპარეზებს.

0.116647