მსოფლიოს პირველმა ჩოგანმა ნოვაკ ჯოკოვიჩმა დაადასტურა, რომ ტოკიოს ოლიმპიადაზე იასპარეზებს და საჩოგბურთო ოქროს სლემის მოპოვებას ეცდება. მას ამ მიმართულებით, სამი ნაბიჯი უკვე გადადგმული აქვს - ავსტრალიის და საფრანგეთის ღია პირველობები, ასევე უიმბლდონი მოიგო.
ჩოგბურთის ისტორიაში, ჯერ არ ყოფილა მამაკაცი ჩოგბურთელი, ვისაც ერთ სეზონში, დიდი სლემის ოთხივე ტურნირი და ოლიმპიადა აქვს მოგებული. ქალტა შორის ასეთი მიღწევა მხოლოდ შტეფი გრაფს აქვს, ვინც ეს 1988 წელს შეძლო.
უიმბლდონზე გამარჯვების შემდეგ, ჯოკოვიჩმა განაცხადა, რომ ოლიმპიადაზე მის გამოსვლასთან დაკავშირებით, შანსი 50-50-ზე იყო. მაგრამ ხუთშაბათს მანვე განაცხადა, რომ ტოკიოს ბილეთი დაჯავშნა.
„მიხარია, რომ ტოკიოსთვის ბარგი უკვე ჩავალაგე და მალე ჩვენს ეროვნულ გუნდს შევუერთდები. ჩემთვის სერბეთის სახელით თამაში, ყოველთვის სასიამოვნო იყო. ეს დამატებითი მოტივაციაც არის და ყველანაირად ვეცდები, ყველა გავახარო“, - განაცხადა ჯოკოვიჩმა.
ტოკიოს ოლიმპიადას არაერთი სახელოვანი ჩოგბურთელი გამოტოვებს. მათ შორის არიან როჯერ ფედერერი, რაფაელ ნადალი, სერენა უილიამსი, სტან ვავრინკა და სიმონა ჰალეპი.
