„ინეოს გრენადერსის“ ეკვადორელი ვარსკვლავის, რიჩარდ კარაპასის გამარჯვებით დასრულდა შვეიცარიის რვადღიანი ტური, რომელიც ტურ დე ფრანსის წინ, ბოლო დიდი რეპეტიცია იყო. შვეიცარიული რბოლის ბოლო, სამთო ეტაპი კი „ბაჰრეინ ვიქტორიოუსის“ შვეიცარიელმა ჯინო მადერმა მოიგო, ვინც წლევანდელ ჯიროზეც ერთი ეტაპის მოგება შეძლო.

ბოლო ეტაპზე, კარაპასის მთავარი მიზანი, იმ 17-წამიანი უპირატესობის შენარჩუნება იყო, რაც უახლოეს მდევართან, კოლუმბიელ რიგობერდო ურანთან (EF ედუქეიშენ-ნიპო) აშორებდა. ურანმა რამდენჯერმე სცადა მისი ჩამოტოვება, მაგრამ ამაოდ. მას ყოველთვის თანაგუნდელები ეხმარებოდნენ - „ინეოსის“ მარატებელი საფრთხეზე ყოველთვის დროულად რეაგირებდა.

„ძალიან ბედნიერი ვარ. ეს გუნდის გამარჯვებაა, რადგან ჩვენ შეწყობილად ვმუშაობდით. როცა იცი, რომ ყველაფერს კარგად აკეთებ, შესაფერის ჯილდოსაც ღებულობ. რაც მთავარია, ამ მოგებამ თავდაჯერება კიდევ უფრო გაგვიძლიერა, რაც მალე დაგვჭირდება“, - განაცხადა 28 წლის კარაპასმა.

ეკვადორელი ფიქრობს, რომ ტურ დე ფრანსზე მის გუნდს ერთის ნაცვლად, ორი ლიდრი ეყოლება. ამ ორიდან ერთი ტურის ყოფილი ჩემპიონი, უელსელი გერეინ თომასია, მეორე კი თავად კარაპასი.