ლონდონის „ტოტენჰემის“ გენერალური დირექტორის პოსტი იტალიელმა ფაბიო პარატიჩიმ დაიკავა. ინგლისური კლუბის ვებგვერდის ინფორმაციით, ის მუშაობა 1 ივლისიდან შეუდგება.

„აღფრთოვანებული ვარ ამ ფანტასტიკური შესაძლებლობით და მადლობას ვუხდი კლუბს და პრეზიდენტს ჩემი ნდობისთვის. „ტოტენჰემი“ ერთ-ერთი საუკეთესო გუნდია დიდ ბრიტანეთსა და ევროპაში და ამბიციური გრძელვადიანი გეგმები აქვს. მჯერა, გუნდთან ერთად ვიმუშავებთ კლუბის ისტორიაში ახალი თავის დასაწერად“, - თქვა პარატიჩიმ.

შეგახსენებთ, ფაბიო პარატიჩი 2010-2021 წლებში ტურინის „იუვენტუსში“ წარმატებით მუშაობდა და მასთან ერთად „იუვემ“ ამ 11 წელიწადში 19 ტიტული მოიგო, ჩემპიონთა ლიგის ფინალში კი ორჯერ გავიდა. ტურინულ გრანდამდე პარატიჩი გენუის „სამპდორიაში“ იყო დასაქმებული.