ძიუდო

20:28 | 9.06.2021 | ნანახია [] - ჯერ

ტატო გრიგალაშვილის ვერცხლის მედალი მსოფლიოს ჩემპიონატზე

უნგრეთის დედაქალაქ ბუდაპეშტში მიმდინარე მსოფლიოს ჩემპიონატზე ტატო გრიგალაშვილმა ვერცხლის მედალი მოიპოვა. ქართველი დიდებულად ასპარეზობდა და ფინალამდე ისე მივიდა, რომ ქულაც არ დაუკარგავს, მაგრამ გადამწყვეტი შეხვედრა წააგო.

21 წლის ქართველი ძიუდოისტი პირველი წრისგან თავისუფალი იყო და ასპარეზობაში მეორე წრიდან ჩაერთო, სადაც სამხრეთ კორეელ მონ ჯინ ლის აჯობა. ტატომ ამის შემდეგ შვედი რობინ პაცეკი, ბერძენი ალექსიოს ნტანაციდისი და ბელგიელი სამი შოუში დაამარცხა. ნახევარფინალში მისი მეტოქე გამოცდილი ნიდერლანდელი ფრენკ დე ვიტი იყო, რომელსაც 23 წამში ულამაზესი გდებით და იპონით უმარტივესად მოუგო. ფინალში ის ბელგიელ მატიას კასეს დაუპირისპირდა და ყველაფერი დამატებით დროში ოქროს ქულამ გადაწყვეტა - ბელგიელმა საბოლოოდ იპონით იმარჯვა და ტატო ვერცხლს დასჯერდა.

ამავე წონაში ლუკა მაისურაძემ კარგად დაიწყო გამოსვლა და ამერიკელი არტურ რაიტი და კანადელი ეტიენ ბრიანდი დაამარცხა, მაგრამ უზბეკ შაროფიდინ ბოლტაბოევთან მარცხი განიცადა და ასპარეზობას გამოეთიშა.

შეგახსენებთ, მიმდინარე მსოფლიოს ჩემპიონატზე საქართველოს აქტივში ერთი ოქროს და ერთი ვერცხლის მედალია. 8 ივნისს, 73 კგ წონით კატეგორიაში ლაშა შავდათუაშვილმა მოიგო, რომელიც პირველი ქართველი ძიუდოისტი გახდა, ვინც ევროპის, მსოფლიოსა და ოლიმპიური ჩემპიონობა მოახერხა.

0.111163