ლუის ჰამილტონ გახდა ფორმულა 1-ის პირველი პილოტი, ვინც პოულ პოზიციაზე მეასედ დადგება. მან ეს მიღწევა ბარსელონაში, ესპანეთის დიდი პრიზის საკვალიფიკაციო რბოლაში გამარჯვებით დააფიქსირა. მსოფლიოს შვიდგზის ჩემპიონმა მთავარ კონკურენტს, მაქს ფერსტაპენს 0.036 წამით აჯობა.
5082 დღე გავიდა მას შემდეგ, რაც ჰამილტონმა თავის კარიერაში პირველი პოული მოიგო. ეს 2007 წელს, კანადის დიდ პრიზზე მოხდა. და ეს ჰამილტონის მეექვსე რბოლა იყო ფორმულა ერთში. მაშინ ვერავინ წარმოიდგენდა, თუ 22 წლის ბიჭი ამდენს მიაღწევდა.
შედარებისთვის, მსოფლიოს შვიდგზის ჩემპიონ მიხაელ შუმახერს 68 პოულ პოზიცია აქვს მოპოვებული, აირტონ სენას ანგარიშზე კი 65 პოულია. გარდა ამისა, ჰამილტონს იმაზე ორჯერ მეტი პოული აქვს, ვიდრე ორგზის ჩემპიონ ჯიმ კლარკს, ოთხგზის ჩემპიონ ალენ პროსტს და 1992 წლის ჩემპიონ ნაიჯელ მენსელს ჯამში აქვთ დაგროვილი.
„არ მჯერა, რომ ასს მივაღწიეთ. ეს ყველაფერი, ჩვენ გუნდს და მისი საწარმოს თანამშრომლების - მამაკაცების და ქალების შრომის შედეგია. ისინ ყოველთვის ცდილობენ თამასის კიდევ უფრო მაღლა აწევას. მათთან ერთად მუშაობა, ოცნების რეალობად ქცევაა. ისეთი შეგრძნება მაქვს, თითქოს პირველი პოული მოვიპოვე“, - განაცხადა ჰამილტონმა.
მეორე ადგილით კმაყოფილია ფერსტაპენი, ვინც ჰამილტონს 8 ქულით ჩამორჩება: „კარგი წრე გავიარე. მეორე წრეზე რაღაც ისე არ წავიდა. მაგრამ დღეს მეორე ადგილი ძალიან კარგია ჩვენთვის. ვიცი, რომ მათი დამარცხება ძნელი იქნება. მთავარია, ახლოს ვიყო. იმედია, კარგი რბოლა გვექნება“.
აღსანიშნავია, რომ 2016 წლის რბოლის დასაწყისში, თანაგუნდელ ნიკო როსბერგთან შეჯახების შემდეგ, ბარსელონაში ჰამილტონი დაუმარცხებელია. მისი შანსი ამჯერადაც მაღალია, რადგან ბარსელონას ტრეკზე, ყველაზე ხშირად პოულზე მდგარი პილოტები იგებენ. ასე მოხდა ბოლო 30-დან 22 რბოლაში.
ესპანეთის დიდი პრიზი
კვალიფიკაცია
- ლუის ჰამილტონი (ბრიტანეთი, მერსედესი) 1'16.741
- მაქს ფერსტაპენი (ჰოლანდია, რედ ბული) 0.036
- ვალტერი ბოტასი (ფინეთი, მერსედესი) 0.132
- შარლ ლეკლერი (მონაკო, ფერარი) 0.769
- ესტებან ოკონი (საფრანგეთი, ალპინი) 0.839
- კარლოს საინსი (ესპანეთი, ფერარი) 0.879
- დანიელ რიკარდო (ავსტრალია, მაკლარენი) 0.881
- სერხიო პერესი (მექსიკა, რედ ბული) 0.960
- ლანდო ნორისი (ბრიტანეთი, მაკლარენი) 1.269
- ფერნანდო ალონსო (ესპანეთი, ალპინი) 1.406
- ლანს სტროლი (კანადა, ასტონ მარტინი) 1.233
- პიერ გასლი (საფრანგეთი, ალფატაური) 1.241
- სებასტიან ფეტელი (გერმანია, ასტონ მარტინი) 1.338
- ანტონიო ჯოვინაცი (იტალია, ალფა რომეო) 1.615
- ჯორჯ რასელი (ბრიტანეთი, უილიამსი) 2.413
- იუკი ცუნოდა (იაპონია, ალფატაური) 1.815
- კიმი რაიკონენი (ფინეთი, ალფა რომეო) 2.176
- მიკ შუმახერი (გერმანია, ჰაასი) 2.376
- ნიკოლას ლატიფი (კანადა, უილიამსი) 2.478
- ნიკიტა მაზეპინი (რუსეთი, ჰაასი) 3.066
