რუსეთის პრემიერლიგის 28-ე ტურში ვოლგოგრადის „როტორმა“ გროზნოს „ახმატს“ უმასპინძლა და უმძიმეს ბრძოლაში უმნიშვნელოვანესი გამარჯვება ალექსეი შჩეტკინის გოლით მოიპოვა (1:0).

საგოლე კომბინაცია ნიკა ყიფიანმა დაიწყო, რომელმაც ქუსლით შესანიშნავი პასი გააკეთა, შეტევა გაგრძელდა და გოლით დასრულდა. ყიფიანი 81-ე წუთზე შეცვალეს. ძირითად შემადგენლობაში იყო ზურიკო დავითაშვილიც, რომელიც მოედანზე 62-ე წუთამდე იმყოფებოდა, ხოლო სოლომონ კვირკველიამ შეუცვლელად ითამაშა, ისევე როგორც „დინამო ბათუმის“ ყოფილმა თავდამსხმელმა ჯოვინო ფლამარიონმა.

„როტორმა“ 21 ქულა დააგროვა და გასავარდნი ზონიდან პლეი-აუტის ზონაში აღზევდა, მაგრამ „უფასთან" ერთად თანაბარი ქულები აქვს. ვოლგოგრადელები მომდევნო შეხვედრაში 7 მაისს „სოჭის“ სტუმრად დაუპირისპირდებიან.

ყაზანის „რუბინმა“ ხვიჩა კვარაცხელიას გარეშე მოსკოვის „დინამო“ ჯორჯ დესპოტოვიჩისა და ჰვან ინ-ბუმის გოლებით 2:0 დაამარცხა. აღსანიშნავია, რომ ლეონიდ სლუცკის გუნდი 54-ე წუთიდან რიცხობრივ უმცირესობაში თამაშობდა. ყაზანელებმა 49 ქულა დააგროვეს და მეოთხე ადგილზე, კონფერენს ლიგის ზონაში არიან, ამ ეტაპზე ჩემპიონთა ლიგის ზონაში მოხვედრის შანსიც არსებობს. „რუბინი“ მომდევნო ტურში 8 მაისს ტულის „არსენალს“ ესტუმრება, მოახერხებს თუ არა ამ მატჩში ხვიჩა კვარაცხელია თამაშს, ჯერჯერობით უცნობია.