კალათბურთი

10:25 | 20.04.2021 | ნანახია [] - ჯერ

ბითაძემ სან ანტონიოსთან სასტარტო ხუთეულში დაიწყო და ნაყოფიერი შეხვედრა ჩაატარა!" (+VIDEO)

ეროვნული საკალათბურთო ასოციაციის მორიგ ტურში გოგა ბითაძის „ინდიანა პეისერსი“ „სან ანტონიო სპურსს“ დაუპირისპირდა და ზედიზედ მესამე მარცხი განიცადა. ინდიანაპოლისელებმა პირველი პერიოდი 15 ქულით წააგეს და ამ ჩამორჩენის აღმოფხვრა თამაშის ბოლომდე ვერ შეძლეს. „სან ანტონიომ“ მეტოქეს 109:94 აჯობა.

გოგა ბითაძე მიმდინარე სეზონში მეორედ და კარიერაში მეოთხედ „ინდიანას“ სასტარტო ხუთეულში იყო. ქართველმა ცენტრმა 22:47 წუთში 7 ქულა, 9 მოხსნა და 5 დაფარება მიითვალა. გოგამ 5-დან 1 ორქულიანი და 6-დან 5 საჯარიმო ჩააგდო, ხოლო 2 სამქულიანი ააცილა. ჩვენებური მეოთხე პერიოდის მე-2 წუთზე შეცვალეს, რადგანაც მან მცირე ტრავმა მიიღო.

აღსანიშნავია, რომ ბითაძემ ეროვნულ საკალათბურთო ასოციაციაში თავისი რეკორდი გაიმეორა და თამაშში 5 დაფარება მეორედ მიითვალა. ამ კომპონენტში ქართველი კალათბურთელი ორივე გუნდში საუკეთესო იყო - „პეისერსს“ ჯამში 7 დაფარება ჰქონდა და აქედან 5 მის ანგარიშზეა, ხოლო „სან ანტონიოს“ ყველა მოთამაშეს მთლიანობაში 4 ბლოკშოტი დაუგროვდათ.

„ინდიანას“ რიგებში საუკეთესო მალკოლმ ბროგდონი იყო, რომელმაც 18 ქულა, 6 მოხსნა და 5 პასი მიითვალა, ხოლო „სან ანტონიოში“ დემარ დეროზანი 18 ქულით, 8 მოხსნითა და 6 პასით გამოირჩა.

„ინდიანა პეისერსი“ 26 გამარჯვებით და 31 მარცხით აღმოსავლეთ კონფერენციაში მეცხრე ადგილზეა და მომდევნო შეხვედრას 22 აპრილს, საკუთარ მოედანზე „ოკლაჰომას“ წინააღმდეგ გამართავს.

0.112665