‘ბათუმმა’ ‘იუნკერებს’ თბილისში 27:17 სძლია და დიდი 10-ის გარდამავალი ტურნირის ზედა ექვსეულში, მინიმუმ დღეს საღამომდე პირველ ადგილზე აღზევდა.

თამაში კიკეთელების შეტევებით დაიწყო, მაგრამ გადაცემის ჩაჭრას კონტრშეტევა მოყვა, რომლის ბოლო ფაზაში სტუმრებმა ფრთაზე მეტობა შექმნეს და დავით ტრაპაიძემ ლელო გაიტანა. ტაიმის შუაში ზღვისპირელებმა შეძლეს სათამაშო უპირატესობის მოპოვება და რაქიდან ლელო გიორგი თხილაიშვილმა გაიტანა, ხოლო 31-ე წუთზე, მატჩის საუკეთესო მოთამაშე თხილაიშვილმა, ხანგრძლივი შეტევისას ხაზი გაჭრა და დუბლი შეასრულა. ბექა ურჯუკაშვილმა ორივე გარდასახა – 0:19.

ტაიმის ბოლოს მასპინძლებმა შეძლეს მეტოქის 22-ში ფეხის მოკიდება და ზედ შესვენების წინ რაქიდან ლელო გიორგი კურტანიძემ გაიტანა, ხოლო რამაზ ხარაზიშვილმა გარდასახა.

მეორე ტაიმის დასაწყისში ურჯუკაშვილმა კარის წინ გატანილი ჯარიმით სტუმართა უპირატესობა გაზარდა, თუმცა იქვე ‘იუნკერებმა’ ხელდახელ შეუტია და გიო ყუფარაძემ პარაშუტის პასით ლელო ლაშა საჯაიას გაატანინა. განახლდა შეხვედრა და ‘ბათუმმა’ მეტოქეს ბურთი აართვა, ბექა ურჯუკაშვილმა მბოჭავი ჩამოიშორა და ლელო გაიტანა.

მალევე ბექა მამრიკიშვილმა უხელო ბოჭვისთვის წითელი ბარათი მიიღო და სტუმრები კაცნაკლულები დარჩნენ. 59-ე წუთზე ყვითელი ბარათი ლაშა ხმალაძემ მიიღო და ზღვისპირელები მოედანზე 13 კაცის ამარა დარჩნენ, რითაც ‘იუნკერებმა’ ისარგებლა და გიორგი შერმადინმა მალევე ლელო გაიტანა, მაგრამ არც გარდასახვა იყო ზუსტი, არც ამის შემდეგ შეცვლილა ანგარიში და სტუმრებმა საქმე დამაჯერებელ გამარჯვებამდე მიიყვანეს – 27:17.