„რედ ბულ რეისინგის“ მრჩეველი ჰელმუტ მარკო არ უარყოფს, რომ ავსტრიული გუნდი კომპანია „ფოლკსვაგენთან“ მოლაპარაკებას აწარმოებს. გერმანული ავტოგგანტი ფორმულა 1-ში თავისი ბრენდის, „პორშეს“ დაბრუნების მიზანშეწონილებას სწავლობს.

განიხილება ორი ვარიანტი - მსოფლიო ჩემპიონატზე საკუთარი გუნდის გამოყვანა, ან მხოლოდ ძრავების მიწოდება. დაბრუნების სავარაუდო დრო 2025 წელია. ეს ინფორმაცია „ფოლკსვაგენის“ ჯგუფის მოტორსპორტის შტოს ვიცე პრეზიდენტმა ფრიც ენცინგერმა გაავრცელა.

„ჩვენ მუდმივი ურთიერთობა გვაქვს, მაგრამ ჯერჯერობით არაფერი გადაგვიწყვეტია“, - ამბობს მარკო, ვინც იმასაც აღიარებს, მოლაპარაკებას სხვა კომპანიებთანაც აწარმოებდა.

ბიბისის ინფორმაციით, „პორშესთან“ პარტნიორობით ასევე „მაკლარენი“ და „უილიამსი“ არიან დაინტერესებულნი, რომლებიც 2021 წლის სეზონში „მერსედესის“ აგრეგატებით ისარგებლებენ. თუმცა „რედ ბულის“ და „პორშეს“ პარტნიორობა ყველაზე მეტად სავარაუდოა.

მარკო ამბობს, რომ „რედ ბულს“ საჭიროების შემთხვევაში, ძრავებზე დამოუკიდებლად მუშაობაც შეუძლია. თუმცა ეს ხარჯებთან იქნება დაკავშირებული. როგორც ცნობილია, ამჟამად გუნდს ძრავებს „ჰონდა“ აწვდის, რომელიც ამ სეზონის ბოლოს ფ1-ს დატოვებს. „რედ ბული“ კი იაპონურ ძრავებს თავად დაამზადებს. ამის საშუალებას გუნდს ის გარემოება აძლევს, რომ 2025 წლამდე ძრავების რეგლამენტი გაიყინა.