ფუტსალში ევროპის 2022 წლის ჩემპიონატის შესარჩევ ეტაპზე საქართველოს ნაკრებმა მესამე ტურის მატჩი ჩაატარა. ავთანდილ ასათიანის გუნდი თბილისში სომხეთს დაუხვდა და ძალიან ადვილად დაამარცხა.

შეიძლება ითქვას, მეტოქეს მისალმება არ ვაცადეთ და უკვე ანგარიში 2:0 იყო. ბრწყინვალე გახლდათ ელისანდრო, რომელმაც მეოთხე წუთისთვის დუბლის გაფორმება მოახერხა და საქართველომ სოლიდური უპირატესობა მოიპოვა. მიუხედავად იმისა, რომ მთელი ტაიმი წინ იყო, აღარაფერი შეცვლილა და ასათიანის შეგირდებმა უპირატესობის გამყარება შესვენების შემდეგ დაიწყეს.

მეორე ნახევარში სომხეთის ნაკრებმა კვლავ ვერაფერი გაახერხა ელისადროს წინააღმდეგ და ბრაზილიელმა ჰეთ-თრიქი შეასრულა, ხოლო ცოტა ხანში თავი არჩილ სებისკვერაძემ გამოიჩინა და ანგარიში 4:0 გახდა. სებისკვერაძემ მატჩის ბოლოს დუბლი გაიფორმა, ამჯერად მან ნამდვილი შედევრი შექმნა და მეტოქის კარი ფანტასტიკური გოლით დალაშქრა.

საქართველოს ნაკრებმა მიმდინარე შესარჩევ ციკლში პირველი გამარჯვება მოიპოვა და სამი ტურის თავზე 4 ქულით სატურნირო ცხრილში მეორე ადგილზეა, ხოლო მომდევნო შეხვედრას 10 მარტს, ისევ სომხეთის ნაკრებთან გამართავს, ოღონდ სტუმრად.

ცნობისთვის, ევროპის 2022 წლის ჩემპიონატი ნიდერლანდებში 9 იანვრიდან 6 თებერვლამდე ჩატარდება. მასპინძელს ფინალურ ეტაპზე თამაშის უფლება უკვე მოპოვებული აქვს. ნიდერლანდების გარდა, შესარჩევი ციკლის 8 ჯგუფის გამარჯვებულები და 6 საუკეთესო მეორეადგილოსანი ფინალურ ეტაპზე ავტომატურად გავა, ბოლო მე-16 მონაწილის ვინაობა კი უარეს ორ მეორეადგილოსანს შორის ორრაუნდიანი პლეი-ოფით გაირკვევა.

საქართველო - სომხეთი 5:0 (2:0)

გოლები: 1:0 ელისანდრო (2), 2:0 ელისანდრო (4), 3:0 ელისანდრო (24), 4:0 სებისკვერაძე (27), 5:0 სებისკვერაძე (39)