სხვა

18:12 | 5.03.2021 | ნანახია [] - ჯერ

წყალბურთი - "დინამო თბილისმა" "ბარსელონეტასთან" უშანსოდ წააგო

საქართველოს მოქმედმა ჩემპიონმა „დინამო თბილისმა“ წყალბურთის ჩემპიონთა ლიგაზე მეშვიდე ტურის მატჩი ჩაატარა და ზედიზედ მეოთხე მარცხი განიცადა. დეიან სტანოევიჩის გუნდი ესპანურ „ბარსელონეტას“ გაეჯიბრა და პირდაპირ ვთქვათ - წინააღმდეგობა ვერ გაუწია.

პირველი ტაიმი ისე დასრულდა, რომ „დინამომ“ გოლიც ვერ გაიტანა: პირველი პერიოდი 0:3 და მეორე 0:4 წააგო. ცხადია, მატჩის ბედიც აქ გადაწყვეტილი იყო და მეორე ნახევარს აბსოლუტურად ფორმალური სახე მიეცა.

თუმცა შესვენების შემდეგ „დინამო თბილისი“ უკეთ ათამაშდა, მეოთხე პერიოდი არ დაუთმია და საბოლოოდ, 6:14 დამარცხდა. „დინამოს“ რიგებში დუბლი ბორის ვაპენსკიმ შეასრულა, ხოლო თითოჯერ თავის გამოჩენა დუშან ვაშიჩმა, სანდრო ადეიშვილმა, ანდრია ბითაძემ და ბესარიონ ახვლედიანმა მოახერხეს.

დეიან სტანოევიჩის გუნდი 7 ტურის თავზე 1 მოგებით, 6 წაგებით და შესაბამისად 3 ქულით მეოთხე-მეექვსე ადგილებს „იადრანთან“ და „ვასპო ჰანოვერთან“ ერთად იყოფს, მომდევნო შეხვედრას კი 20 აპრილს, „იადრანის“ წინააღმდეგ გამართავს, რომელთანაც საქართველოს ჩემპიონმა პირველ წრეში 11:8 მოიგო.

„დინამო თბილისი“ – „ბარსელონეტა“ 6:14 (0:3, 0:4, 3:4, 3:3)

0.114628