იტალიური „ნაპოლის“ ფეხბურთელმა ვიქტორ ოსიმჰენმა ბერგამოს „ატალანტასთან“ შეხვედრაში მძიმე ტრავმა მიიღო. ნიგერიელი თავდამსხმელი კრისტიან რომეროსთან ორთაბრძოლისას დაშავდა და მოედანზე დაეცა, რის შედეგადაც გონება დაკარგა.
მის ირგვლივ მყოფმა ფეხბურთელებმა მაშინვე თავში ხელები წაიშინეს, რაც დაზიანების სიმძიმეზე მიანიშნებდა და ფეხბურთელი დაუყოვნებლივ ბერგამოს საავადმყოფოში გადაიყვანეს. სამედიცინო გამოკვლევამ თავის ტრავმა დააფიქსირა, თუმცა ამ დროისთვის საგანგაშო არაფერია და აფრიკელ შემტევს ჰოსპიტალიდან დიდი ალბათობით, დღეს გაწერენ.
შეგახსენებთ, რომ „ატალანტამ“ „ნაპოლი“ 4:2 დაამარცხა. ოსიმჰენი ნეაპოლელებმა გასულ ზაფხულს ფრანგული „ლილიდან“ 60 მილიონ ევროდ შეიძინეს, მაგრამ ჯერჯერობით 22 წლის შემტევი მოლოდინს ვერ ამართლებს და 14 მატჩში მხოლოდ 2 გოლის გატანა მოახერხა.
